پۋتين بيلىگىنە قارسى شىققان الەكسەي ناۆالنىي 19 جىلعا سوتتالدى

2144
Adyrna.kz Telegram
https://adyrna.kz/content/uploads/2023/08/bragazeta-ru-5967415-e1612259413225-1024x576-2.jpg
ماسكەۋ قالالىق سوتىنىڭ شەشىمىمەن رەسەيلىك تانىمال وپپوزيتسيونەر الەكسەي ناۆالنىي 19 جىلعا باس بوستاندىعىنان ايىرىلدى. وعان "ەكسترەميستەر قاۋىمداستىعىن قۇرعاندىعى" ءۇشىن وسىنداي جازا تاعايىندالدى، دەپ حابارلايدى "ادىرنا" ۇلتتىق پورتالى.  الەكسەي ناۆالنيگە جەتى ەپيزود بويىنشا ايىپ تاعىلدى، ونىڭ ىشىندە ەكسترەميستىك قىزمەتتى قارجىلاندىرۋ جانە ءناتسيزمدى جاڭعىرتۋ دەگەن ايىپتار دا بار، دەپ حابارلايدى ربك. تەرگەۋ مالىمەتتەرىنە سەنسەك، ناۆالنىي 2014 جىلعا دەيىن رەسەيدەگى مەملەكەتتىك تۇتاستىق پەن كونستيتۋتسيالىق قۇرىلىستى قۇلدىراتۋعا باعىتتالعان ەكسترەميستىك قاۋىمداستىق قۇرعان. اتالعان ۇيىمدى قارجىلاندىرۋ جولىندا سەگىز كوممەرتسيالىق ەمەس ۇيىم قۇرعان. سوت مۇنداي ۇيىمنىڭ ىشىندە ءتۇرلى فيرمالار مەن قورلار بار ەكەندىگىن ايتادى. ەسكە سالا كەتەيىك، رەسەيلىك ساياساتكەر، وپپوزيتسيا بەلسەندىسى ناۆالنىي 2021 جىلدىڭ قاڭتارىندا ۇستالدى. ونى پوليتسيا ەمدەلىپ، گەرمانيادان ورالعاننان كەيىن "يۆ روش" ءىسى بويىنشا قۇرىقتادى.  باستاپقىدا ول 3,5 جىلعا باس بوستاندىعىنان ايىرىلدى. سودان كەيىن ماسكەۋ سوتىنا ناۆالنىيعا قارسى جاڭا قىلمىستىق ءىس كەلىپ ءتۇستى. بۇل جولى ول الاياقتىق جانە سوتقا قۇرمەت كورسەتپەۋ ءىسى بويىنشا 9 جىلعا سوتتالدى. ول كەزدە ايىپتاۋشى تاراپ بۇرىنعى ساياساتكەرگە 13 جىلعا دەيىن باس بوستاندىعىنان ايىرۋ جازاسىن سۇراعان بولاتىن. 2023 جىلدىڭ ساۋىرىندە ناۆالنىيعا قاتىستى تەرروريزم فاكتىسى بويىنشا ءىس قوزعالدى. سوت شەشىمى بويىنشا ناۆالنىي ەشكىممەن حات-حابار الماسا المايدى. قول-اياعى كىسەندەۋلى كۇيدە جازاسىن وتەيدى.

"ادىرنا" ۇلتتىق پورتالى

پىكىرلەر