پرەزيدەنت قاسىم-جومارت توقاەۆ قازاقستاننىڭ 2020–2030 جىلدارعا ارنالعان سىرتقى ساياسات تۇجىرىمداماسىنا وزگەرىستەر ەنگىزدى. ەڭ ەلەۋلى جاڭالىقتاردىڭ ءبىرى – قۇجاتتان قازاقستاننىڭ تۇڭعىش پرەزيدەنتى نۇرسۇلتان نازارباەۆ تۋرالى ەسكەرتۋلەردىڭ الىنىپ تاستالۋى، دەپ حابارلايدى «ادىرنا» ءتىلشىسى «اق جايىققا» سىلتەمە جاساپ.
مەملەكەت باسشىسى تۇجىرىمداماعا وزگەرىستەر ەنگىزۋ تۋرالى جارلىققا 14 تامىزدا قول قويعان. قۇجاتتىڭ بۇعان دەيىنگى رەداكتسياسىندا نەگىزگى قاعيداتتاردىڭ ءبىرى رەتىندە «ەل دامۋىنىڭ جاڭا كەزەڭىندەگى تۇڭعىش پرەزيدەنت – ەلباسى ن.ءا. نازارباەۆتىڭ سىرتقى ساياسي باعىتىنىڭ ساباقتاستىعى» كورسەتىلگەن ەدى. ەندى بۇل تارماق ەكس-پرەزيدەنتتىڭ اتى-ءجونى اتالماي، «ەل دامۋىنىڭ جاڭا كەزەڭىندەگى سىرتقى ساياسي باعىتتىڭ ساباقتاستىعى» دەپ وزگەرتىلگەن.
سونداي-اق تۇجىرىمدامادان نازارباەۆتىڭ سىرتقى ساياساتتىڭ اسا ماڭىزدى ماسەلەلەرى بويىنشا باستامالارىمەن حالىققا، مەملەكەتتىك ورگاندار مەن لاۋازىمدى تۇلعالارعا ءومىر بويى جۇگىنۋ قۇقىعى تۋرالى ەرەجە تولىعىمەن الىنىپ تاستالعان.
«7-تاراۋدىڭ 1-تارماعى الىپ تاستالسىن»، – دەلىنگەن جارلىقتا.
تۇجىرىمدامانىڭ ءماتىنى جاڭا كونستيتۋتسياعا سايكەس كەلتىرىلگەن. اتاپ ايتقاندا، «ازامات» ۇعىمى «قازاقستان رەسپۋبليكاسىنىڭ ازاماتى» دەپ وزگەرتىلسە، «تاۋەلسىزدىك» جانە «ەگەمەندىك» سوزدەرى باس ارىپپەن جازىلاتىن بولدى، ال «پارلامەنت» ءسوزى «قۇرىلتاي» سوزىمەن اۋىستىرىلعان.
ايتا كەتەيىك، وزگەرىستەر جارلىققا قول قويىلعان كۇننەن باستاپ كۇشىنە ەندى.
