3 تامىز كۇنى ورال قالاسى، № 28-قاتاڭ رەجيمدەگى كولونياسىندا 50 تۇتقىننىڭ اياۋسىز سوققىعا جىعىلعانى حابارلاندى. بۇل تۋرالى ولاردىڭ تۋىستارى حابارلادى. سونىمەن قاتار الەۋمەتتىك جەلىدە تۇرمەدەگى ازاماتتاردىڭ جاي-كۇيىن ايعاقتايتىن ۆيدەو تارادى، دەپ حابارلايدى "ادىرنا" ۇلتتىق پورتالى.
ورال قالاسىندا ورنالاسقان № 28 كولونياسىنىڭ تۇتقىندارى مەكەمە قىزمەتكەرلەرى مەن اسكەري قىزمەتشىلەر تاراپىنان اياۋسىز سوققىعا جىعىلعانى ءمالىم بولدى. بىرنەشە سوتتالۋشى بۇل تۋرالى تۋىستارىنا ايتقان. كەيىن تۇتقىنداردىڭ تۋىستارى مەن جاقىندارى كولونيا الدىنا جينالعان. جازاسىن وتەۋشىلەردىڭ انالارى مەن جارلارى مەكەمە باسشىلىعىمەن كەزدەسۋدى تالاپ ەتىپ، ازاپتالعان ازاماتتاردى اۋرۋحاناعا جاتقىزۋعا تالپىنعان.
- "مەن، سوتتالعان رايىمبەك سەرىكوۆ ەسىمدى ازامات، قازىر يق-28-دە جازامدى وتەپ جاتىرمىن، وتكەن جىلى مەكەمە قىزمەتكەرلەرى ءبىزدى ۇرىپ-سوقتى. سودان كەيىن مەن نارازىلىق تانىتىپ، ءومىردى العا تارتا وتىرىپ، "ەسەپ ايىرىسۋعا" تىرىستىم... تاعى دا ءدال وسىنداي جاعداي بولدى. ءبىز كامەرادا وتىرامىز. ءبىزدى ءبىر-بىرتىندەن الىپ كەتەدى. كەيىن بەينەباقىلاۋ جوق جەردە مازاق ەتىپ، ۇرىپ-سوعادى، ازاپتايدى، - دەيدى ۆيدەو اۆتورىنىڭ ءبىرى.باسشىلىق مۇنداي دەرەكتى جوققا شىعارمادى. ولار جازاسىن وتەۋشىلەردىڭ باسىنعانىن، تۇزەۋ مەكەمەسىندەگىلەرگە قارسىلىق كورسەتكەنىن، قاراۋىلشىنى ۇرىپ-cوقپاق بولعانىن العا تارتىپ وتىر. ىشكى ىستەر مينيسترلىگى ورال كولونياسىنداعى تۇتقىنداردى ۇرىپ-سوعۋعا قاتىستى اقپاراتقا تۇسىنىكتەمە بەردى.
"كامەرالاردىڭ بىرىندە تۇتقىندار مەكەمە قىزمەتكەرلەرى مەن اسكەري قىزمەتشىگە شابۋىل جاساعان. وقيعا ورنىنا قوسىمشا كۇش جىبەرىلدى. باعىنباعاندارعا كۇش قولدانىلىپ، ارنايى قۇرالدار پايدالانىلدى. ودان كەيىنگى بولۋى ىقتيمال زاڭسىز ارەكەتتەردىڭ الدىن الۋ ءۇشىن ولاردىڭ ءبىر بولىگى يزولياتورعا ورنالاستىرىلدى", - دەدى ءىمم.
"ادىرنا" ۇلتتىق پورتالى
