كەلىنشەكتىڭ ايتۋىنشا، ءۇش بالاسىن تاستاپ ۇيدەن قاشۋىنا بۇرىنعى كۇيەۋىنىڭ مىنەزى سەبەپ بولىپتى.
"كۇيەۋىم ەكەۋىمىز 2002 جىلى نەكەگە تۇرىپ 2013 جىلى اجىراسىپ كەتتىك. جولداسىم جات اعىمعا كىرىپ، ۇيدەن بەرەكە كەتتى. ماعان ءماجبۇرلى تۇردە حيدجاپ كيگىزىپ، ناماز وقىتتى. "نامازدى دۇرىس وقىمادىڭ، انانى دۇرىس ىستەمەدىڭ" دەپ كۇنى-ءتۇنى ءتيىسىپ، ءتىپتى ۇراتىن. مەن مەديتسينا سالاسىندا جۇمىس ىستەيتىندىكتەن باستىقتار حيدجاپتى شەشۋىمدى تالاپ ەتتى. بۇكىل سۇمدىق وسىدان سوڭ باستالدى.
"جۇمىسىڭدا ويناسىڭ بار، كورىنگەن ەركەكپەن جاتاسىڭ، كوزىمە ءشوپ سالاسىڭ. مەن سەنى ەگىن باسىنا اپارىپ اتىپ تاستايمىن" دەپ قورقىتا باستادى. جۇمىسىم ەكى ماۋسىمدا ەدى. ءبىر كۇنى تۇندەلەتىپ ۇيگە كەلسەم ەدەن قان بولىپ جاتىر. ۇلكەن قىزىمنان سۇراسام "پاپام ونى بۇزىقتىق جاساعانى ءۇشىن بەتىنەن ۇردى" دەيدى. كۇيەۋىم قىزداردى ءوزى دە ۇراتىن بۇرىن مەنى دە ايامايتىن", - دەپ كوزىنە جاس الدى كەلىنشەك.
كەلىشەكتىڭ ايتۋىنشا، ءۇش قىزىن وگەي شەشەلەرى ولىمشە ەتىپ ساباۋىنا بۇرىنعى كۇيەۋىنىڭ دە قاتىسى بار بولۋى مۇمكىن.
"مەن ول كەلىنشەكتى تانىمايمىن. بىراق ءوزى دە انا عوي. بالالاردى ءدال وسىلاي ۇرۋىنا ءبىر سەبەپ بار. مەنىڭ ويىمشا كۇيەۋى ءدال مەن سەكىلدى ونى دا يتتەي قىلىپ، مازاسىن الدى. سوسىن ول بار اشۋىن مەنىڭ بالالارىمنان العان. ايتپەسە ولىمشە ەتىپ سابايتىنداي ولار قىلمىسكەر ەمەس قوي. سەبەبى مەندە نەكەدە تۇرعان كەزىمدە كۇيەۋىمنىڭ قورلىعىنان جۇيكەم سىر بەرىپ ءوز شاشىمدى ءوزىم جۇلعان ساتتەرىم بولدى. ونىڭ بارىنە كىنالى بۇرىنعى كۇيەۋىم", - دەيدى كەلىنشەك.
ال ءۇش قىزدىڭ اكەسى بۇرىنعى ايەلىنىڭ ءسوزىن تولىقتاي جالا دەپ وتىر.
"2013 جىلى ەش سەبەپسىز ۇيدەن قاشىپ كەتكەن ەدى. سونى قىزدارىم كەشىرە المادى. ءتىپتى ءالى كۇنگە دەيىن ونىمەن سويلەسپەيدى. ناماز وقيتىنىم راس، بىراق جات اعىمدا ەمەسپىن. جۇلدىزدىڭ قورقىتىپ حيدجاپ كيگىزدى دەگەنى وتىرىك. يسلامدا قيناۋ جوق، بارلىعى جۇرەكپەن. قۇدايدىڭ الدىندا، جارىق دۇنيەدە اقپىن", - دەيدى ەر ادام.
ەر ازامات ەكى ايەلىنىڭ دە قىلىعىن كەشىرمەيمىن دەپ وتىر. ەكىنشى جارىمەن ازاماتتىق نەكەدە، ورتاق ءبىر ۇلى بار. كۇدىكتى كەلىنشەك ەكىنشى بالاسىنا جەتى ايلىق ەكىقابات ەكەن. ال تاياق جەگەن اعايىندى ءۇش قىز قازىر شىمكەنتتە تەرگەۋشىلەرگە تۇسىنىك بەرۋدە ەكەن.
زاڭگەر ايگۇل ورىنبەكتىڭ سوزىنشە، قىزداردىڭ اكە-شەشەسى مەن اجەلەرى جانە وزگەدە تۋىستارى جاۋاپقا تارتىلاتىندارىن ءبىلىپ، اپالى-سىڭلىلەردى ءوز مۇددەلەرىنە پايدالانۋدا.
"قىزدار ابدەن قورقىپ قالعان. كىم نە ايت دەسە، سونى قايتالايدى. ناقتى پىكىرلەرى جوق. ياعني، بىرەسە اكەسىنىڭ بىردە اناسىنىڭ ءسوزىن سويلەيدى. سوندىقتان دا ولاردى سوت شەشىمى شىققانشا بەيىمدەۋ ورتالىعىنا ورنالاستىرىپ، پسيحولوگ مامانداردىڭ ەمىنە وتۋلەرى قاجەت. سوت كەزىندە ولاردىڭ وزدەرى شەشۋلەرى كەرەك كىممەن قالاتىنىن. مەن ءۇش تاراپتىڭ دا پىكىرىن تىڭدادىم، بارلىعى وزدەرىن اقتاپ الەك. سوندىقتان مەن تەك بالالاردىڭ عانا قۇقىن قورعاۋعا عانا اتسالىسامىن", - دەيدى ول.
ال ءۇش قىزدىڭ تۋعان اناسى بالالارىن وزىنە قالدىرۋ ءۇشىن ەندى بارىن سالماق. ءتىپتى سوتتاسۋعا دايىن. قىزداردى اجەسىنىڭ تاربيەسىنە وتكىزۋگە دە قارسى. ونىڭ سەبەبىن "ولارعا بالا ەمەس، اسىراۋشى رەتىندە بەرىلەتىن اقشا عانا ماڭىزدى" دەپ قىسقا قايىردى.
بالالارىن ولىمشە ەتىپ ساباعان ايەلدى قاتاڭ جازالاپ، جاڭا ءومىر باستاۋدى ماقسات قويۋدا. وسى ۋاقىتقا دەيىن بوي كورسەتپەۋىنىڭ سەبەبىن، بۇرىنعى كۇيەۋىنەن قورىققانىمەن ءتۇسىندىرىپ وتىر. الايدا قازاقستاندى ءدۇر سىلكىندىرگەن اعايىندىلاردىڭ ەندىگى تاعدىرىن سوت شەشەتىن بولادى.
ايتا كەتەيىك، تۇركىستان وبلىسىندا وگەي انا بالالارعا ءزابىر كورسەتتى دەگەن كۇدىككە ىلىنگەن. ارتىنشا ونىڭ ەكىنشى سابيىنە اياعى اۋىر ەكەنى بەلگىلى بولدى. كۇدىكتەلگەن كەلىنشەك، ءتىپتى، قىزدارعا كورسەتكەن قورلىعىن جازۋ ءۇشىن "جازالاۋ" داپتەرىن ارناعانى دا حابارلاندى.
سونىمەن قاتار، وگەي اناسىنان قورلىق كورگەن قىزدارعا قاتىستى سۇمدىق جايت بەلگىلى بولعان ەدى.
بۇعان قاتىستى ءۇنسىز قالماي كۇدىكتى ايەلدىڭ اكەسى دە ءوز شىندىعىنايتقان بولاتىن.
