Kelınşektıŋ aituynşa, üş balasyn tastap üiden qaşuyna būrynǧy küieuınıŋ mınezı sebep bolypty.
"Küieuım ekeuımız 2002 jyly nekege tūryp 2013 jyly ajyrasyp kettık. Joldasym jat aǧymǧa kırıp, üiden bereke kettı. Maǧan mäjbürlı türde hidjap kigızıp, namaz oqytty. "Namazdy dūrys oqymadyŋ, anany dūrys ıstemedıŋ" dep künı-tünı tiısıp, tıptı ūratyn. Men medisina salasynda jūmys ısteitındıkten bastyqtar hidjapty şeşuımdı talap ettı. Bükıl sūmdyq osydan soŋ bastaldy.
"Jūmysyŋda oinasyŋ bar, körıngen erkekpen jatasyŋ, közıme şöp salasyŋ. Men senı egın basyna aparyp atyp tastaimyn" dep qorqyta bastady. Jūmysym ekı mausymda edı. Bır künı tündeletıp üige kelsem eden qan bolyp jatyr. Ülken qyzymnan sūrasam "papam ony būzyqtyq jasaǧany üşın betınen ūrdy" deidı. Küieuım qyzdardy özı de ūratyn būryn menı de aiamaityn", - dep közıne jas aldy kelınşek.
Kelışektıŋ aituynşa, üş qyzyn ögei şeşelerı ölımşe etıp sabauyna būrynǧy küieuınıŋ de qatysy bar boluy mümkın.
"Men ol kelınşektı tanymaimyn. Bıraq özı de ana ǧoi. Balalardy däl osylai ūruyna bır sebep bar. Menıŋ oiymşa küieuı däl men sekıldı ony da ittei qylyp, mazasyn aldy. Sosyn ol bar aşuyn menıŋ balalarymnan alǧan. Äitpese ölımşe etıp sabaityndai olar qylmysker emes qoi. Sebebı mende nekede tūrǧan kezımde küieuımnıŋ qorlyǧynan jüikem syr berıp öz şaşymdy özım jūlǧan sätterım boldy. Onyŋ bärıne kınälı būrynǧy küieuım", - deidı kelınşek.
Al üş qyzdyŋ äkesı būrynǧy äielınıŋ sözın tolyqtai jala dep otyr.
"2013 jyly eş sebepsız üiden qaşyp ketken edı. Sony qyzdarym keşıre almady. Tıptı älı künge deiın onymen söilespeidı. Namaz oqitynym ras, bıraq jat aǧymda emespın. Jūldyzdyŋ qorqytyp hidjap kigızdı degenı ötırık. İslamda qinau joq, barlyǧy jürekpen. Qūdaidyŋ aldynda, jaryq düniede aqpyn", - deidı er adam.
Er azamat ekı äielınıŋ de qylyǧyn keşırmeimın dep otyr. Ekınşı jarymen azamattyq nekede, ortaq bır ūly bar. Küdıktı kelınşek ekınşı balasyna jetı ailyq ekıqabat eken. Al taiaq jegen aǧaiyndy üş qyz qazır Şymkentte tergeuşılerge tüsınık berude eken.
Zaŋger Aigül Orynbektıŋ sözınşe, qyzdardyŋ äke-şeşesı men äjelerı jäne özgede tuystary jauapqa tartylatyndaryn bılıp, apaly-sıŋlılerdı öz müddelerıne paidalanuda.
"Qyzdar äbden qorqyp qalǧan. Kım ne ait dese, sony qaitalaidy. Naqty pıkırlerı joq. Iаǧni, bırese äkesınıŋ bırde anasynyŋ sözın söileidı. Sondyqtan da olardy sot şeşımı şyqqanşa beiımdeu ortalyǧyna ornalastyryp, psiholog mamandardyŋ emıne ötulerı qajet. Sot kezınde olardyŋ özderı şeşulerı kerek kımmen qalatynyn. Men üş taraptyŋ da pıkırın tyŋdadym, barlyǧy özderın aqtap älek. Sondyqtan men tek balalardyŋ ǧana qūqyn qorǧauǧa ǧana atsalysamyn", - deidı ol.
Al üş qyzdyŋ tuǧan anasy balalaryn özıne qaldyru üşın endı baryn salmaq. Tıptı sottasuǧa daiyn. Qyzdardy äjesınıŋ tärbiesıne ötkızuge de qarsy. Onyŋ sebebın "olarǧa bala emes, asyrauşy retınde berıletın aqşa ǧana maŋyzdy" dep qysqa qaiyrdy.
Balalaryn ölımşe etıp sabaǧan äieldı qataŋ jazalap, jaŋa ömır bastaudy maqsat qoiuda. Osy uaqytqa deiın boi körsetpeuınıŋ sebebın, būrynǧy küieuınen qoryqqanymen tüsındırıp otyr. Alaida Qazaqstandy dür sılkındırgen aǧaiyndylardyŋ endıgı taǧdyryn sot şeşetın bolady.
Aita keteiık, Türkıstan oblysynda ögei ana balalarǧa zäbır körsettı degen küdıkke ılıngen. Artynşa onyŋ ekınşı säbiıne aiaǧy auyr ekenı belgılı boldy. Küdıktelgen kelınşek, tıptı, qyzdarǧa körsetken qorlyǧyn jazu üşın "jazalau" däpterın arnaǧany da habarlandy.
Sonymen qatar, ögei anasynan qorlyq körgen qyzdarǧa qatysty sūmdyq jait belgılı bolǧan edı.
Būǧan qatysty ünsız qalmai küdıktı äieldıŋ äkesı de öz şyndyǧynaitqan bolatyn.
