Kelinshektiń aıtýynsha, úsh balasyn tastap úıden qashýyna burynǵy kúıeýiniń minezi sebep bolypty.
"Kúıeýim ekeýimiz 2002 jyly nekege turyp 2013 jyly ajyrasyp kettik. Joldasym jat aǵymǵa kirip, úıden bereke ketti. Maǵan májbúrli túrde hıdjap kıgizip, namaz oqytty. "Namazdy durys oqymadyń, anany durys istemediń" dep kúni-túni tıisip, tipti uratyn. Men medıına salasynda jumys isteıtindikten bastyqtar hıdjapty sheshýimdi talap etti. Búkil sumdyq osydan soń bastaldy.
"Jumysyńda oınasyń bar, kóringen erkekpen jatasyń, kózime shóp salasyń. Men seni egin basyna aparyp atyp tastaımyn" dep qorqyta bastady. Jumysym eki maýsymda edi. Bir kúni túndeletip úıge kelsem eden qan bolyp jatyr. Úlken qyzymnan surasam "papam ony buzyqtyq jasaǵany úshin betinen urdy" deıdi. Kúıeýim qyzdardy ózi de uratyn buryn meni de aıamaıtyn", - dep kózine jas aldy kelinshek.
Kelishektiń aıtýynsha, úsh qyzyn ógeı shesheleri ólimshe etip sabaýyna burynǵy kúıeýiniń de qatysy bar bolýy múmkin.
"Men ol kelinshekti tanymaımyn. Biraq ózi de ana ǵoı. Balalardy dál osylaı urýyna bir sebep bar. Meniń oıymsha kúıeýi dál men sekildi ony da ıtteı qylyp, mazasyn aldy. Sosyn ol bar ashýyn meniń balalarymnan alǵan. Áıtpese ólimshe etip sabaıtyndaı olar qylmysker emes qoı. Sebebi mende nekede turǵan kezimde kúıeýimniń qorlyǵynan júıkem syr berip óz shashymdy ózim julǵan sátterim boldy. Onyń bárine kináli burynǵy kúıeýim", - deıdi kelinshek.
Al úsh qyzdyń ákesi burynǵy áıeliniń sózin tolyqtaı jala dep otyr.
"2013 jyly esh sebepsiz úıden qashyp ketken edi. Sony qyzdarym keshire almady. Tipti áli kúnge deıin onymen sóılespeıdi. Namaz oqıtynym ras, biraq jat aǵymda emespin. Juldyzdyń qorqytyp hıdjap kıgizdi degeni ótirik. Islamda qınaý joq, barlyǵy júrekpen. Qudaıdyń aldynda, jaryq dúnıede aqpyn", - deıdi er adam.
Er azamat eki áıeliniń de qylyǵyn keshirmeımin dep otyr. Ekinshi jarymen azamattyq nekede, ortaq bir uly bar. Kúdikti kelinshek ekinshi balasyna jeti aılyq ekiqabat eken. Al taıaq jegen aǵaıyndy úsh qyz qazir Shymkentte tergeýshilerge túsinik berýde eken.
Zańger Aıgúl Orynbektiń sózinshe, qyzdardyń áke-sheshesi men ájeleri jáne ózgede týystary jaýapqa tartylatyndaryn bilip, apaly-sińlilerdi óz múddelerine paıdalanýda.
"Qyzdar ábden qorqyp qalǵan. Kim ne aıt dese, sony qaıtalaıdy. Naqty pikirleri joq. Iaǵnı, birese ákesiniń birde anasynyń sózin sóıleıdi. Sondyqtan da olardy sot sheshimi shyqqansha beıimdeý ortalyǵyna ornalastyryp, psıholog mamandardyń emine ótýleri qajet. Sot kezinde olardyń ózderi sheshýleri kerek kimmen qalatynyn. Men úsh taraptyń da pikirin tyńdadym, barlyǵy ózderin aqtap álek. Sondyqtan men tek balalardyń ǵana quqyn qorǵaýǵa ǵana atsalysamyn", - deıdi ol.
Al úsh qyzdyń týǵan anasy balalaryn ózine qaldyrý úshin endi baryn salmaq. Tipti sottasýǵa daıyn. Qyzdardy ájesiniń tárbıesine ótkizýge de qarsy. Onyń sebebin "olarǵa bala emes, asyraýshy retinde beriletin aqsha ǵana mańyzdy" dep qysqa qaıyrdy.
Balalaryn ólimshe etip sabaǵan áıeldi qatań jazalap, jańa ómir bastaýdy maqsat qoıýda. Osy ýaqytqa deıin boı kórsetpeýiniń sebebin, burynǵy kúıeýinen qoryqqanymen túsindirip otyr. Alaıda Qazaqstandy dúr silkindirgen aǵaıyndylardyń endigi taǵdyryn sot sheshetin bolady.
Aıta keteıik, Túrkistan oblysynda ógeı ana balalarǵa zábir kórsetti degen kúdikke ilingen. Artynsha onyń ekinshi sábıine aıaǵy aýyr ekeni belgili boldy. Kúdiktelgen kelinshek, tipti, qyzdarǵa kórsetken qorlyǵyn jazý úshin "jazalaý" dápterin arnaǵany da habarlandy.
Sonymen qatar, ógeı anasynan qorlyq kórgen qyzdarǵa qatysty sumdyq jaıt belgili bolǵan edi.
Buǵan qatysty únsiz qalmaı kúdikti áıeldiń ákesi de óz shyndyǵynaıtqan bolatyn.
