قازاقستان رەسپۋبليكاسىنىڭ باس پروكۋراتۋراسى سەپاراتيزم مەن ۇلتارالىق ارازدىقتى قوزدىردى دەپ ايىپتالعان قازاقستان ازاماتى ماكسيم ياكوۆچەنكونى ەكستراديتسيالاۋ ماقساتىندا رەسەيلىك مەكەمەگە ساۋال جولداعان. بۇل تۋرالى «موي گورود» پورتالى جاريالادى، دەپ حابارلايدى “ادىرنا” ۇلتتىق پورتالى.
10 تامىزدا جاريالاعان اقپاراتقا سايكەس، قازاقستان رەسپۋبليكاسىنىڭ باس پروكۋراتۋراسى الەۋمەتتىك جەلىدەگى جازبالار بويىنشا ورال مەن قازاقستاننىڭ باسقا دا قالالارىن رەسەيگە كوشىرۋگە ۇگىتتەگەن ماكسيم ياكوۆچەنكونى ەكستراديتسيالاۋ تۋرالى ءوتىنىش بەرگەن. قازىرگى ۋاقىتتا بۇل ءوتىنىش رەسەي باس پروكۋراتۋراسىنىڭ قارالۋىندا.
قر ىشكى ىستەر مينيسترلىگىنەن الىنعان اقپاراتقا سايكەس، ەلدىڭ باس پروكۋراتۋراسى ياكوۆچەنكونى ەكستراديتسيالاۋ تۋرالى ءوتىنىشتى ناۋرىز ايىندا جىبەرگەن. بۇل سۇراۋ ءالى تەكسەرۋ ساتىسىندا. سەپاراتيزمگە ايىپتالعان سوتتالۋشى وتكەن جىلدىڭ 8 قىركۇيەگىندە ەلدەن شىعىپ كەتكەن، سول ارقىلى ەلدەن شىقپاۋ مىندەتىن بۇزعان. جاۋاپتى لاۋازىمدى تۇلعالار زاڭدى جاۋاپكەرشىلىككە تارتىلدى.
ماكسيم ياكوۆچەنكونىڭ «ۆكونتاكتە» الەۋمەتتىك جەلىسىندە سەپاراتيستىك ۇندەۋلەردى 2022 جىلدىڭ اقپان ايىندا جاريالاعانى اتاپ ءوتىلدى. وسىدان كەيىن بىردەن وعان قر قىلمىستىق كودەكسىنىڭ ەكى بابى بويىنشا ايىپ تاعىلدى.
ەر ادام بۇل ءىس بويىنشا ورال قالالىق سوتىنىڭ سوت وتىرىسىنا كەلمەدى، ناتيجەسىندە وعان ىزدەۋ جاريالاندى. ارتىنشا ياكوۆچەنكونىڭ ەلدەن شىعۋىنا شەكتەۋ قويىلعانىنا قاراماستان قازاقستاننان كەتىپ، رەسەيگە قاشىپ كەتكەنى بەلگىلى بولدى.
