تۇركىستان وبلىسىندا جەر قويناۋىن زاڭسىز پايدالانۋشىلارعا قارسى كۇرەس كۇشەيتىلدى. وبلىس اۋماعىندا 100-دەن استام كارەرلەردىڭ جۇمىستارى جاپپاي تەكسەرىلىپ جاتىر. رەيدتىك شارالار وتكىزىلىپ، ايىپپۇل سالىنۋدا. جىل باسىنان بەرى كەلىسىمشارتتىق مىندەتتەمەلەرىن تولىق ورىنداماعان جانە سۋ قورعاۋ بەلدەۋىندە ورنالاسقان 11 جەر قويناۋىن پايدالانۋشىنىڭ كەلىسىمشارتتارى مەرزىمىنەن بۇرىن توقتاتىلعان.
تۇركىستان وبلىسىنىڭ اكىمى دارحان ساتىبالدى جەر بايلىعىن زاڭسىز يگەرگەندەردى ءبىرجولاتا توقتاتۋ تۋرالى قاتاڭ تاپسىرما بەردى. وبلى اكىمىنىڭ توراعالىعىمەن وتكەن ماجىلىستە وزەكتى تاقىرىپ تاعى دا تالقىلاندى. بۇل باعىتتا اتقارىلعان جۇمىس ناتيجەلەرى باياندالدى. وزەندەردىڭ ارناسىن بۇزىپ، تاۋ-تاستى، تاريحي ورىنداردى قوپارىپ، زاڭسىز قۇم، تاس جانە وزگە دە پايدالى قازبا الىپ جاتقان كاسىپكەرلەردىڭ ارەكەتى وتكىر سىنالدى.
وبلىستىق كاسىپكەرلىك جانە ونەركاسىپ باسقارماسىنىڭ باسشىسى نۇرجىگىت مىرزاحمەتوۆتىڭ بايانداۋىنشا، سايرام اۋدانىنىڭ اۋماعىنداعى 3 جەر قويناۋىن پايدالانۋشى اقسۋ وزەنىنىڭ سۋ قورعاۋ بەلدەۋىندە ورنالاسۋىنا بايلانىستى كەلىسىمشارتتارىنىڭ قولدانىسى مەرزىمىنەن بۇرىن توقتاتىلعان. سونداي-اق «سىرداريا-تۇركىستان» مەملەكەتتىك وڭىرلىك تابيعي پاركىنىڭ ەرەكشە قورعالاتىن اۋماقتارىنا كىرۋىنە بايلانىستى ارىس قالاسىنىڭ اۋماعىندا ورنالاسقان ءۇش جەر قويناۋىن پايدالانۋشى جۇمىسىن توقتاتتى. ورداباسى، ساۋران، تولەبي جانە تۇلكىباس، شاردارا اۋداندارىندا ورنالاسقان كەن ورىندارىنىڭ سۋ قورعاۋى بەلدەۋىنە ورنالاسۋىنا جانە كەلىسىمشارتتىق مىندەتتەمەلەرىن ورىنداماۋىنا بايلانىستى كەلىسىمشارتتىڭ قولدانىسى مەرزىمىنەن بۇرىن توقتاتىلدى. تابيعاتقا زالال كەلتىرگەن مەكەمەلەر قازعان جەردى تەگىستەۋ كەرەك.
- بۇل ماسەلە نە ءۇشىن بولىپ جاتىر؟ ءاربىر مەملەكەتتىك ورگان ءوز مىندەتىن دۇرىس اتقارىپ وتىرسا، بىردە - ءبىر زاڭسىز كارەر بولماس ەدى. ولاردىڭ جۇمىسىن ءبىرجولاتا توقتاتۋ كەرەك. حالىقپەن كەزدەسۋ كەزىندە دە وسى ماسەلە ءجيى كوتەرىلەدى. تۇرعىندارىمىز زاڭسىز كارەرلەردەن زارداپ شەگۋدە. كارەر قازعاننان وزەندەر مەن بۇلاقتار تارتىلىپ جاتىر. ونىڭ ۇستىنە اۋىر كولىكتەر ميلليارداعان قاراجاتقا سالىنىپ جاتقان تاسجولداردىڭ تاس - تالقانىن شىعارىپ جاتىر. ولاردى قورعاعانداردىڭ ءوزىن قىلمىسكەر، دەپ سانايمىن، - دەدى تۇركىستان وبلىسىنىڭ اكىمى دارحان ساتىبالدى.
