“تانىسپاساڭ - تاياق جەيسىڭ”. تانىسپاعانى ءۇشىن بويجەتكەندى سوققىعا جىققان

الماتىدا تانىسۋدان باس تارتقان قىزدى بەيتانىس جىگىت سوققىعا جىققان، دەپ حابارلايدى “ادىرنا” Massaget.kz-كە سىلتەمە جاساپ. الەۋمەتتىك جەلىدە بويجەتكەن سوققىعا جىعىلعانى تۋرالى ايتقان. الماتىنىڭ ورتالىق كوشەسىندە بەلگىسىز بەيتانىس جىگىت ونىمەن تانىسقىسى كەلگەن. الايدا بويجەتكەن تانىستىقتان باس تارتادى.  جابىرلەنۋشىنىڭ ايتۋىنشا وقيعا وسىدان بىرنەشە كۇن بۇرىن ساتباەۆ كوشەسىندە بولعان. «قۇربىممەن وزەننىڭ جاعاسىندا وتىردىق. قولىندا سىرا ۇستاپ العان ەكى جىگىت جاقىنداپ، بىزبەن تانىسقىسى كەلدى. ءبىز ەكى رەت سىپايى تۇردە باس تارتتىق، كەيىن ولاردىڭ ءبىرى "نەگە تانىسقىلارىڭ كەلمەي تۇر؟" دەپ، بوقتاپ، ءتىل تيگىزە باستادى. ول بايقاتپاستان جاقتان ۇرىپ جىبەردى. ەسىمنەن تانىپ قالدىم، كەيىن 102, 103-كە حابارلاستىق", - دەيدى. ەڭ سوراقىسى ءتارتىپ ساقشىلارى قىزداردىڭ ءوزىن تۇندە قىدىرعانى ءۇشىن كىنالاعان. بويجەتكەن: "پروكۋراتۋراعا ء"ىستى تەرگەۋشىگە بەرىڭدەر، ولار اكىمشىلىك ەمەس، قىلمىستىق ءىس قوزعاسىن" دەپ ەكى رەت حات جازدى. زاڭىمىزدىڭ سيقى وسى. 17 كۇن ءوتتى، ونى ءالى تاپپادى... ول مەنىڭ جاعىمدى سىندىرماسا دا، مەنىڭ پسيحيكامدى بۇزدى. ولار ءىستى وپەرعا دا، تەرگەۋشىگە دە بەرە المايدى. وندا كامەرا جوق، سوندىقتان ونى تابا الماي جاتىر", - دەدى زارداپ شەككەن قىز. الماتى پوليتسيا دەپارتامەنتىنىڭ ءباسپاسوز قىزمەتى وقيعاعا قاتىستى تۇسىنىك بەردى. "كۇدىكتىلەردى انىقتاۋ جانە ۇستاۋ بويىنشا جەدەل ءىس-شارالار جۇرگىزىلىپ جاتىر. جابىرلەنۋشىنىڭ العان جاراقاتىنىڭ اۋىرلىعىن انىقتاۋ ماقساتىندا سوت-مەديتسينالىق ساراپتاما تاعايىندالدى", - دەلىنگەن حابارلامادا.