74 جاستاعى زەينەتكەر ليفت شاحتاسىنا قۇلاپ، كوز جۇمدى، دەپ حابارلايدى “ادىرنا” ءتىلشىسى.
تۇركىستان قالاسى اكىمدىگىنىڭ حابارلاۋىنشا، 13 تامىز كۇنى ساعات 19:18-دە «جاڭا قالا» مولتەك اۋدانىنداعى ۇيلەردىڭ بىرىندە ليفتتە جوندەۋ جۇمىستارىن جۇرگىزىلىپ جاتقان. جوندەۋ جۇمىستارىنا بايلانىستى ليفت كابينكاسى بەسىنشى قاباتقا توقتاتىلعان. 1949 جىلى تۋعان ايەل ادام بىرىنشى قاباتتاعى ءليفتىنىڭ ەسىگىن اشىپ، ليفت شاحتاسىنا قۇلاعان. تۇرعىن جاراقات سالدارىنان اۋرۋحانادا قايتىس بولدى.
جوندەۋ جۇمىستارى تۋرالى ءۇي تۇرعىندارىنا الدىن الا حابارلانعان. اتالعان ءىس بويىنشا تەرگەۋ امالدارى جۇرگىزىلۋدە.
"جوندەۋ جۇمىستارىنا بايلانىستى ەسىكتەردىڭ بارلىعى جابىلعان بولاتىن. ال زارداپ شەگۋشىنىڭ ەسىكتى قالاي اشىپ العانى تەكسەرىلىپ جاتىر", - دەدى تۇركىستان قالالىق تۇرعىن ءۇي ينسپەكتسياسى ءبولىمىنىڭ باسشىسى تالعات ۇسەنباەۆ.
ۇقساس جاڭالىقتار
