رەسەي تاراپى كەنەسارى حاننىڭ باس سۇيەگى جوق ەكەنىن ايتتى

قازاقستاننىڭ سوڭعى حانى كەنەسارىنىڭ باس سۇيەگى رەسەي مۇراجايلاردىڭ بىرىندە بولۋى مۇمكىن دەگەن اقپارات تاراعان بولاتىن. الايدا رەسەي بۇل اقپاراتتى جوققا شىعارىپ وتىر، دەپ حابارلايدى “ادىرنا” ءتىلشىسى.  قازاقستاندىقتار ءوز تاۋەلسىزدىگىن العان جىلداردان بەرى ەلدىڭ سوڭعى حانى سانالعان كەنەسارىنىڭ باس سۇيەگىن قايتارۋدى سۇراپ كەلەدى. بىراق ءالى كۇنگە دەيىن حاننىڭ باسى تابىلماي، ەلگە قايتارىلماي كەلەدى. ءتىپتى ناقتى سەبەپ تە جوق. قر سىرتقى ىستەر مينيسترلىگىنىڭ رەسمي وكىلى ايبەك سمادياروۆ وسى جاعدايعا بايلانىستى رەسەيلىك تاراپتىڭ نۇسقاسىن ۇسىندى. «حان باسى تابيعاتتا جوق»، - دەيدى. «مۇنداي سۇراقتارمەن مىقتى تاريحشىلار، ارنايى ماماندار اينالىسۋى ءتيىس. بىراق سوعان قاراماستان، بىزگە ءتۇرلى ساۋالدار جولدانادى. ءبىز رەسەيلىك تاراپقا جولدايمىز. كەيبىر مالىمەتتەرگە سايكەس، رەسەيلىك تاراپ باس سۇيەكتىڭ تابيعاتتا جوق ەكەنىن ايتادى. دۇرىس جاۋاپتى تاريحشىلاردىڭ بەرگەنى دۇرىس دەپ ويلايمىن»، - دەدى سمادياروۆ. الايدا قازاقستاندىق ماماندار باس سۇيەكتى رەسەي مۇراجايلارىنىڭ بىرىندە زەرتتەگەن. ومبى مۇراجايىنداعى باس سۇيەك 2021 جىلى 90% ىقتيمالدىقپەن كەنەسارى حانعا تيەسىلى ەكەنى دە حابارلانعان بولاتىن. 1837-1847 جىلدارداعى قازاقتاردىڭ رەسەي يمپەرياسىنان تاۋەلسىزدىك الۋ جولىنداعى ۇلت-ازاتتىق قوزعالىسىنىڭ جەتەكشىسى بولعان كەنەسارى حان 1847 جىلى قايتىس بولدى. قازاقتىڭ سوڭعى حانىنىڭ دەنەسى ولگەننەن كەيىن قازىرگى قىرعىزستان جەرىندە قالىپ، كەسىلگەن باسى ولجا رەتىندە رەسەيگە جەتكىزىلگەن.