شىعىس قازاقستان تۋرالى اڭگىمە قوزعالسا، سول توپىراقتان شىققان تالانتتى جانداردى – ءارىسى اباي مەن شاكارىمدى، بەرىسى ورالحان بوكەيدى ەسكە الماي كەتۋ مۇمكىن ەمەس. بيىل قازاق ادەبيەتىنە “قار قىزى”، “كەربۇعى”، “قايداسىڭ، قاسقا قۇلىنىم”، “اتاۋ كەرە”، “تورتاي مىنگەن اقبوز ات” سىندى وشپەس شىعارمالار سىيلاپ، “التايدىڭ كەربۇعىسى” اتانعان جازۋشى-دراماتۋرگ ورالحان بوكەيدىڭ تۋعانىنا 80 جىل تولادى.
ورالحان بوكەي تۋعان اۋىلىنان الماتىعا وقۋعا اتتانارىندا “كوكشەتاۋ اسقان سۇلۋ بولسا، ودان شىققان اقىن، جازۋشىلار ودان ءارى سۇلۋلاندىردى. ءبىزدىڭ ءور التايدىڭ سۇلۋلىعى ودان استە كەم ەمەس. بىراق ونى جىرعا قوسىپ، سۇلۋلىعىن كورسەتەتىن اقىن، جازۋشىلار جوق دەسەك قاتەلەسپەيمىز. مەن التايدىڭ سۇلۋ تابيعاتىن، سارقىلماس بايلىعىن تانىتۋدى ماقسات ەتەمىن. سوندىقتان دا مەن جازۋشى بولۋدى ارماندايمىن. ادام ارمانىن الدىنا ماقسات ەتىپ قويسا، وعان جەتۋگە ءتيىستى. مەن دە ماقساتىما جەتەمىن دەپ سەنەمىن” دەگەن. ماقساتىنا جەتكەن دە سياقتى. ويتكەنى ورالحاننىڭ شىعارمالارىن وقىعان ادامدا كاتونقاراعايدى كورسەم دەگەن ارمان پايدا بولارى ءسوزسىز.
وسى رەتتە اۋىلدىق ايماقتاردى تۇراقتى دامىتۋ قورى جازۋشىنىڭ 80 جىلدىق مەرەيتويىن اتاپ ءوتۋ باستاماسىن كوتەردى. مەرەيتوي اياسىنداعى باستى ءىس-شارا – جازۋشىنىڭ تۋعان جەرى شىڭعىستاي اۋىلىندا ورالحان بوكەي مۋزەي ءۇيىنىڭ اشىلۋى. اۋىلدىق ايماقتاردى تۇراقتى دامىتۋ قورى ورالحان بوكەي تۇرعان ءۇيدى ساتىپ الىپ، مۋزەي جاساقتاپ جاتىر. قالامگەردىڭ بالالىعى وتكەن ءۇي جەكە زاتتارىمەن، ەستەلىككە تولى جادىگەرلەرمەن تولىقتىرىلىپ، مەرەيتويعا قارسى ەسىگىن اشپاق. بۇل مۋزەيدىڭ ايماققا كەلۋشىلەرگە كاتونقارايعالىق تالانتتى ورەننىڭ شىعارماشىلىعىن ناسيحاتتاۋعا ۇلەس قوساتىنى انىق.
اۋىلدىق ايماقتاردى تۇراقتى دامىتۋ قورىنىڭ باسشىسى سەرىك ءجۇنىسوۆ “كاتونقاراعاي جەرىنە كەلگەن ءار تۋريسكە تاريح، وسى توپىراقتا تۋعان ۇلى تۇلعالاردىڭ ءومىرى قىزىق. كوبى ورالحان بوكەي جايىندا سۇرايدى. ويتكەنى ورەكەڭنىڭ شىعارمالارىن مەكتەپ قابىرعاسىنان بىلەمىز. بىراق ورالحان بوكەي مۋزەيى بىرنەشە جىلدان بەرى جۇمىسىن توقتاتىپ، جابىلىپ قالعان ەدى. قورىمىزدىڭ نەگىزىن قالاۋشى، قۇرىلتايشىسى سەرىك تولىقپاەۆتىڭ قارجىلاي قولداۋ ءبىلدىرۋىنىڭ ارقاسىندا ءۇي ساتىپ الىنىپ، كوپشىلىككە مۇراجاي رەتىندە ۇسىنىلىپ وتىر. ونىڭ ۇستىنە، بۇگىندە مۋزەي مەملەكەت بالانسىنا بەرىلدى. بۇل ءبارىمىز ۇيرەنگەن مۇراجايلاردان الدەقايدا ەرەكشە بولماق. ويتكەنى بۇل – ورالحان بوكەيدىڭ بالالىعى وتكەن ءۇيى، جازۋشىنىڭ قالىپتاسۋىنا كۋا بولعان قابىرعالار. ەندى سول رۋحاني ورتا كوپشىلىك ءۇشىن قىزمەت ەتەتىن بولادى» - دەيدى قور باسشىسى.
رەسپۋبليكالىق دەڭگەيدە تويلاناتىن مەرەيتويعا مادەنيەت جانە سپورت مينيسترلىگى، كاتونقاراعاي اۋدانى اكىمدىگى، رەسپۋبليكالىق جازۋشىلار وداعى قولداۋ كورسەتۋدە.
«بۇعان قوسا رەسپۋبليكالىق دەڭگەيدەگى قاتونقاراعاي كاسىپكەرلەرىنىڭ 56 ملن تەڭگە كولەمىندە قاراجات جيناعانىن، اسىرەسە، اتاپ وتكىم كەلەدى. ولاردىڭ قاتارىندا AITAS حولدينگى، «شىعىساگروحولدينگ»، «استانا بيزنەس»، «تەرەزە»، «ەسج» تاۋار بيرجاسى» اق، «قاتونقاراعاي پدۋ»، «مۇز تاۋ» كەشەنى، «وسكەمەن ديىرمەن كومبيناتى»، «جانات» ەمدەۋ-ساۋىقتىرۋ كەشەنى، «Damu Development Group»، «Alash Qurylys QZ»، «پونەدەلنيك پليۋس»، «Elcontech Qazaqstan» كومپانيالارى مەن «ەل-شەجىرە» قورى بار. بۇل ەل اعالارىنىڭ حالىققا، ەلدىڭ رۋحاني قۇندىلىعىنا دەگەن جاناشىرلىعىن كورسەتسە كەرەك.
جالپى، جىل سايىن قاتونقاراعاي كاسىپكەرلەرىنىڭ بىرىگىپ، ۇلكەن سالتاناتتى ءىس-شارا وتكىزۋى يگى داستۇرگە اينالىپ بارادى»، - دەدى سەرىك ءجۇنىسوۆ.
سونىمەن ناقتىراق توقتالا كەتسەك:
25 تامىز كۇنى شىعىس قازاقستان وبلىسى قاتونقاراعاي اۋدانى شىڭعىستاي اۋىلىندا ورالحان بوكەي مۋزەيىنىڭ اشىلۋ سالتاناتى، پلەنەر وتەدى. ءدال سول كۇنى قاتونقاراعاي اۋىلىندا 80 جىلدىققا ارنالعان توي، بايگە ۇيىمداستىرىلماقشى.
ءارى قاراي ءىس-شارالار استانا قالاسىندا جالعاسىن تابادى.
15 قىركۇيەك كۇنى استانا قالاسىنداعى ۇلتتىق مۇراجايدا «ءوز وتىڭدى وشىرمە» اتتى دوڭگەلەك ۇستەل، جاستار تەاترىندا «قار قىزى» سپەكتاكلى قويىلىپ، حازىرەت سۇلتان مەشىتىندە اس بەرىلەدى.
سودان كەيىن 28 قىركۇيەك كۇنى الماتى وبلىسى كەڭساي اۋىلىندا قۇران وقىتىلىپ، اس بەرىلەدى.
سول كۇنى الماتى قالاسى اباي كوشەسى 14 ورنالاسقان قازاقستان رەسپۋبليكاسىنىڭ ۇلتتىق كىتاپحاناسىندا كونفەرەنتسيا جانە 30 قىركۇيەك كۇنى «الاتاۋ» ءداستۇرلى ونەر تەاترىندا الامان ايتىس وتكىزىلەتىن بولادى.
قازاق ادەبيەتىنە سەرپىلىس اكەلگەن قالامگەرلەرىمىزدىڭ ەڭبەگىن ەلەپ، رەسپۋبليكا كولەمىندە اتاپ ءوتۋ – ۇلت رۋحانياتى ءۇشىن ماڭىزدى. مۇنداي ءىس-شارالار كەلەر ۇرپاققا تاريحتى، ادەبيەتتى دارىپتەۋگە، ناسيحاتتاۋعا قوسار ۇلەسى زور.
