يتاليادان قازاقستانعا زاڭسىز جەتكىزىلگەن قۇمىرسقالار الماتى اۋەجايىنان انىقتالدى. ءتاتتىنىڭ ورنىنا 7 قۇتىعا قاتار سالىنىپ، زاڭسىز جونەلتىلگەن جاندىكتەر توبى تاركىلەندى، دەپ حابارلايدى "ادىرنا" ۇلتتىق پورتالى.
الماتى حالىقارالىق اۋەجايىندا مەملەكەتتىك كىرىستەر دەپارتامەنتى، «جەتىسۋ» كەدەن بەكەتىنىڭ قىزمەتكەرلەرى تەكسەرىس جۇرگىزۋ بارىسىندا يتاليادان كەلگەن قۇمىرسقالاردى انىقتادى. قوراپ ىشىنەن كونديتەرلىك ونىمدەردىڭ ورنىنا ءتىرى جاندىكتەر، بولجام بويىنشا قۇمىرسقالارى بار 7 پروبيركا مەن 22 پلاستيكالىق كونتەينەر انىقتالدى.
«ەۋرازيالىق ەكونوميكالىق كوميسسيا القاسىنىڭ سىرتقى ەكونوميكالىق قىزمەتتىڭ تاۋار نومەنكلاتۋراسى كودى بويىنشا جابايى ءتىرى جاندىكتەر ەۋرازيالىق ەكونوميكالىق وداقتىڭ كەدەندىك اۋماعىنا اكەلۋگە رۇقسات بەرۋ ءتارتىبى بەلگىلەنگەن تاۋارلار تىزبەسىنە كىرەدى. وسىلايشا، رۇقسات قۇجاتتارىنسىز ءتىرى جاندىكتەردى قازاقستان رەسپۋبليكاسىنىڭ اۋماعىنا زاڭسىز اكەلۋ ارەكەتى توقتاتىلدى»، - دەلىنگەن مەملەكەتتىك كىرىستەر دەپارتامەنتىنىڭ حابارلاماسىندا.ساپارلاۋشىنىڭ ءتاتتى ورنىنا قۇمىرسقا سالىپ، ونى قازاقستانعا نە سەبەپتى جەتكىزگەنى ازىرگە بەلگىسىز. اتالعان دەرەك بويىنشا ماتەريالدار شەشىم قابىلداۋ ءۇشىن ۋاكىلەتتى مەملەكەتتىك ورگانعا جىبەرىلدى.
"ادىرنا" ۇلتتىق پورتالى
ۇقساس جاڭالىقتار
