قوعام بەلسەندىسى، جۋرناليست باحتيار قاباس الماتى وبلىسى، ەڭبەكشىقازاق اۋدانىنداعى كەلەڭسىز جاعدايدى ايتىپ، باسشىلىققا ۇندەۋ تاستادى. ونىڭ ايتۋىنشا، تۇرعىندار قاتىنايتىن كوپىردى سۋ شايعان. ال وعان مۇلدەم نازار اۋدارماعان اكىمشىلىكتىڭ كەسىرىنەن ادام ءولىمى بولا جازداعان، دەپ حابارلايدى "ادىرنا" ۇلتتىق پورتالى.
جۋرناليست، قوعام بەلسەندىسى باحتيار قاباس ەلدە بەلگىلى ءبىر ماسەلەنى تولىق شەشۋ ءۇشىن "مىندەتتى تۇردە ادام ءولىمى بولۋى ءتيىس پە؟" دەگەن اششى ساۋال تاستاپ، جاۋاپتى مەكەمەلەردىڭ جۇمىسىن سىنعا الادى. سونىمەن قاتار، اۋداندا بولعان وقيعانى ادام شىعىنىنا قاتىستى جاعدايدى ءسوز ەتىپ، جاۋاپتىلاردى سىنايدى:
- وسى بىزدە ماسەلەنى دەر كەزىندە شەشۋگە نە كەدەرگى؟ مىندەتتى تۇردە وقىس وقيعا ورىن الۋ كەرەك پە؟ قايبىر جىلى جاڭالىق اۋىلىنداعى كۇرەجولعا كامەرا مەن جاياۋ جۇرگىنشى جولاعىن سالۋدى حالىق قانشا سۇرادى، سوزباقتاتتىق. ناتيجەسىندە وقۋشىلاردى كولىك قاعىپ، سوڭى ولىممەن اياقتالدى. ارتىنشا ايعا جەتكىزبەي كامەرا دا، جولاق تا پايدا بولدى، - دەيدى اۆتور.كەيىننەن تاعى دا تۇرعىنداردىڭ تالاپ-ارىزى ەسكەرىلمەي، تالعار وزەنىندەگى كوپىردە ادام مەرتىگىپ، جان ءتاسىلىم ەتە جازداعانىن جازادى:
- وتكەندە ەنبەكشىقازاق اۋدانىنداعى ساياجاي تۇرعىندارىنىڭ تالعار وزەنىن قيىپ وتەتىن "قىل كوپىرىن" سۋ شايىپ كەتتى. حالىق تاعى شۋلادى، ءوتىنىش ايتتى. ەنبەكشىقازاق اۋدانى 25- تامىزعا دەيىن جاسايمىز، قالپىنا كەلتىرەمىز دەدى. بىراق تاعى دا سيىر قۇيمىشاققا سالىنىپ، اياقسىز قالدى. مىنە، بۇگىن سول ساياجايدىڭ قوس تۇرعىنى سۋعا اعىپ، تۇرعىنداردىن كومەگىمەن ءبىر اللا ساقتاپ امان قالدى. ەندى وسى جەردەن ادام شىعىنى شىقپاي ءىس بىتپەيىن دەپ تۇر ما؟ ءيا، قازىر حالىق ءوزى قولدان جاساپ العان كوپىر. ويتكەنى اكىمشىلىككە سەنۋدەن قالعان. ەسكەرتۋ بەرىلگەن، قاۋىپتى جەر ەكەنى ەسكەرتىلگەن دەگەن پىكىرلەر اكىمشىلىك تاراپىنان ايتىلاتىنى ءسوزسىز. دەسەك تە، وقۋ جىلى باستالارعا ساناۋلى كۇن قالدى، سول "قىل كوپىرمەن" قانشاما قاراكوزدەرىمىز وتۋگە ءماجبىر! سەبەپ مەكتەپكە اپارار جالعىز توتە جول وسى! ادام ومىرىمەن وينامايىقشى! وبلىس اكىمدىگى وسى ماسەلەنى جەدەلدەتىپ قولعا الادى دەپ سەنەمىن!ازىرگە قۇزىرلى مەكەمەلەر بۇل ماسەلەگە قاتىستى تۇسىنىك بەرمەدى. ال تۇرعىنداردىڭ "شاراسىزدان" بۇقارالىق اقپارات قۇرالدارىنا جۇگىنۋگە ءماجبۇر ەكەندىگى ايتىلادى.
"ادىرنا" ۇلتتىق پورتالى
ۇقساس جاڭالىقتار
