اتىراۋدا 15 جاستاعى قىزدى زورلاعان جاس جىگىت جازادان جالتارىپ كەتتى. سەبەبى كۇدىكتىنىڭ ۇستىنەن قوزعالعان قىلمىستىق ءىس توقتاعان. ويتكەنى قوس تاراپتىڭ اتا-انالارى ءوزارا تاتۋلاسىپ، قۇدا-جەكجات بولۋعا كەلىسكەن، دەپ حابارلايدى «ادىرنا» ءتىلشىسى كتك ارناسىنا سىلتەمە جاساپ.
سوندىقتان جابىرلەنۋشىنىڭ اناسى پوليتسياعا جازعان ارىزىن قايتارىپ العان. وسىدان كەيىن قىلمىستىق ءىس جابىلعان.
«ەندى ەشقانداي جازاعا تارتىلمايتىنىن بىلگەن جىگىت جاق قىزىما كۇن كورسەتپەي، ۇيدەن قۋىپ جىبەردى»،—دەيدى جابىرلەنۋشىنىڭ اناسى. ول ەندى قۇزىرلى ورىنداردان قىلمىستىق ءىستى قايتا قاراۋىن سۇراپ وتىر.15 جاستاعى قىز جىگىتپەن الەۋمەتتىك جەلى ارقىلى تانىسقان. جۇزبە-ءجۇز كورۋى ءۇشىن كەزدەسۋگە دە شاقىرىپتى. ءسويتىپ كولىگىنە مىنگىزىپ الىپ، ايدالاعا اپارىپ، قىزىمدى زورلاعان دەيدى اناسى. بىراق مۇنى مەكتەپ وقۋشىسى ەشكىمگە ايتپاعان. ونى قىزىنىڭ دەنەسىندەگى كوگەرگەن ىزدەرىن كورگەندە عانا ءبىلىپتى. ايەل دەرەۋ قۇزىرلى ورگاندارعا ارىز جازعان. قىلمىستىق ءىس قوزعالىپ، تەرگەۋ باستالعاندا زورلاعان جىگىتتىڭ تۋىستارى كەشىرىم سۇراپ كەلگەن.
«قىزىمدى الىپ كەتتى. شاعىمدى وزگەرتتىك. كەشىرىم بەردىك. ءىس ءبىتىپ جاتقان كەزدە جىگىتتىڭ اپاسى كۇيەۋىمدى الداپ-سۋلاپ، «تەرگەۋشى ءىستى جابىپ، بازادا سوتتالدى دەگەن اقپارات قالماۋى ءۇشىن 1 ميلليون 600 مىڭ تەڭگە اقشا سۇراپ جاتىر دەپ كرەديت العىزىپ، اقشانى الدى. «ءوزىمىز تولەيمىز، الىپ بەر» دەگەن. جىگىتتىڭ اپاسى «ءىس ءبىتتى، ەندى قىزىڭ كەرەك ەمەس» دەپ قىزىما كۇندە-كۇندە ءتيىسىپ، ءتىپتى ساباۋعا دەيىن باردى. قىزىمدى ساباعان سوڭ اپاسىنىڭ ۇستىنەن ارىز جازدىم»،— دەيدى زورلانعان قىزدىڭ اناسى.ار-نامىسىمىز تاپتالدى دەگەن اتا-انا قىلمىستىق ءىستى قايتا كوتەرۋدى سۇراپ پروكۋراتۋرا ارىز جازعان. بىراق قاداعالاۋشى ورگان قاراۋسىز قالدىرعان. سوندىقتان اراشا سۇراعان انا اتىراۋ وبلىسى پروكۋراتۋراسىنا باردى. بىراق پروكۋرورلار بۇعان دەيىنگى ءىستىڭ نەگە جابىلعانىن، جابىرلەنۋشىنىڭ ارىزى نەلىكتەن قارالماعانىن اشىپ ايتا المادى.
«قىلمىستىق پروتسەستىك كودەكسىنىڭ 100-بابىنا سايكەس، قىلمىستىق ءىس بويىنشا پروتسەسكە قاتىسۋشى زاڭدى تۇردە شاعىم كەلتىرە الادى. ەگەر ءۋاجدى ارىز جازسا، ونىڭ ىشىندەگى ۋاجدەر تەكسەرۋگە كەلسە، نەگىزدى بولسا، ءبىز، زاڭ قىزمەتكەرلەرى رەتىندە ونى قاناعاتتاندىرۋعا مىندەتتىمىز»،— دەيدى اتىراۋ وبلىسى پروكۋراتۋراسىنىڭ سوتقا دەيىنگى تەرگەپ-تەكسەرۋ باسقارماسىنىڭ باستىعى شىڭعىس ناسىپقاليەۆ.وسىلاي دەپ زاڭدىلىقتاردى تۇسىندىرگەن پروكۋرور شاعىمدانۋشىنى جەكە قابىلداۋىنا الىپ، اناسى تاعى دا ارىز جازىپ قالدىردى.
