وڭىرىمىزدە ءوندىرىس سالاسىنىڭ وركەندەۋىنە مول ۇلەس قوسىپ كەلە جاتقان قاراجال قالاسىنىڭ 60 جىلدىق مەرەيتويى اتالىپ ءوتتى. سالتاناتتى ءىس-شارانىڭ شىمىلدىعى تەاترلاندىرىلعان قويىلىممەن اشىلدى.
قالا حالقىن مەرەيلى كۇنمەن قۇتتىقتاۋ ءۇشىن ۇلىتاۋ وبلىسىنىڭ اكىمى بەرىك ابدىعاليۇلى ارنايى كەلىپ، ايماقتىڭ ءوسىپ-وركەندەۋىنە، قۇلدىراۋدان كەيىن قايتا بوي تۇزەۋىنە اتسالىسىپ كەلە جاتقان بىرقاتار ازاماتتى وبلىس اكىمىنىڭ العىس حاتىمەن ماراپاتتادى.
«كەيىنگى ون جىلدىقتىڭ كولەمىندە قازىنالى ولكەنىڭ ەكىنشى تىنىسى اشىلعانداي. قالادا الەۋمەتتىك نىساندار بوي كوتەرىپ، رەسپۋبليكالىق ماڭىزى بار قاراجال-جايرەم، قاراجال-جاڭاارقا اۆتوموبيل جولدارى، وبلىستىق ماڭىزى بار قاراجال-اتاسۋ تاس جولى قالپىنا كەلتىرىلدى. بۇدان بولەك، قالاىشىلىك جولداردىڭ جوندەۋ جۇمىستارى دا نازاردان تىس قالعان جوق. اتاپ ايتار بولساق، بيىل قاراجال قالاسىنىڭ 19 كوشەسىنىڭ، جايرەم كەنتىنىڭ 13 كوشەسىنىڭ اۆتوموبيل جولدارىن جاڭارتۋ جۇمىستارى قولعا الىندى» – دەدى ءوڭىر باسشىسى بەرىك ابدىعاليۇلى ءوز سوزىندە.
ءدۇبىرلى ءىس-شارا ءۇش بلوكتان تۇردى. العاشقى بلوكتا قالا حالقى مەن قوناقتارىنا ارنالعان سالتاناتتى كەش ۇيىمداستىرىلسا، ەكىنشى بلوك – ۇلتتىق سپورت الاڭىندا ءوتتى. ال ءۇشىنشى بلوك – قالانىڭ ورتالىق الاڭىندا ەسترادا جۇلدىزدارىنىڭ قاتىسۋىمەن ۇيىمداستىرىلعان كونتسەرت جانە وتشاشۋمەن تۇيىندەلدى.
قاراجال قالاسىنىڭ 60 جىلدىق مەرەيتويىنا وراي ۇيىمداستىرىلعان ءدۇبىرلى جيىنعا ەلىمىزدىڭ بارلىق وڭىرىنەن ۇلتتىق ويىنداردىڭ سپورتشىلارى قاتىستى. قوناقتاردىڭ قۇرمەتىنە 50 كيىز ءۇي تىگىلىپ، ءدام ۇسىنىلدى.
