اپتا باسىنداعى اۋىس-ءتۇيىس: كىمدەر كەتتى؟ كىمدەر كەلدى؟

1 قىركۇيەكتە مەملەكەت  باسشىسى قاسىم-جومارت توقاەۆ قازاقستان حالقىنا جولداۋ جاسادى.  كەزەكتى جولداۋ «ادىلەتتى قازاقستاننىڭ ەكونوميكالىق باعدارى» دەپ اتالدى. ءماجىلىس پەن سەنات باس قوسقان جيىندا قازاقستاننىڭ ىشكى ءارى سىرتقى ساياساتىنا قاتىستى بىرقاتار ماسەلەلەر كوتەرىلىپ، مىندەتتەر جۇكتەلدى. پرەزيدەنت جولداۋدان سوڭ بىرقاتار ءمينيستردى قىزمەتتەن بوساتسا، ەندى ءبىرىن قايتا تاعايىندادى. ۇكىمەتتە مەملەكەت باسشىسىنىڭ "قازاقستان رەسپۋبليكاسىنىڭ مەملەكەتتىك باسقارۋ جۇيەسىن ودان ءارى جەتىلدىرۋ جونىندەگى شارالار تۋرالى" جارلىعىمەن 5 مينيسترلىك قۇرىلدى. ودان بولەك، اپتانىڭ العاشقى كۇنىندە بيلىكتە بىرنەشە اۋىس-ءتۇيىس بولدى. پرەزيدەنت جارلىعىمەن عالىمجان ءپىرماتوۆ ۇلتتىق بانك توراعاسى لاۋازىمىنان بوساتىلدى. 1972 جىلى تۋعان ازامات بۇل قىزمەتكە وتكەن جىلدىڭ اقپان ايىندا تاعايىندالعان بولاتىن. ۇلتتىق بانكتىڭ توراعاسى رەتىندە تيمۋر سۇلەيمەنوۆ تاعايىندالدى. پرەزيدەنت ۇسىنىسىن سەناتورلار ءبىراۋىزدان قولداعان. اۋىل شارۋاشىلىعىن 2 جىل باسقارعان ەربول قاراشوكەەۆ اۋىل شارۋاشىلىعى ءمينيسترى لاۋازىمىنان بوساتىلدى. 2021 جىلدىڭ كۇزىندە مينيسترلىككە كەلگەن ەربول شىراقپايۇلى وتكەن جىلى قايتا تاعايىندالعان ەدى. قاراشوكەەۆتى ايداربەك ساپاروۆ الماستىردى. اۋىل شارۋاشىلىعى ءمينيسترى قىزمەتىندە تاعايىندالعان جاڭا باسشى بۇرىن سولتۇستىك قازاقستان وبلىسىن باسقاردى. پرەزيدەنتتىڭ جاڭا كەڭەسشىسى بولىپ قانات بوزىمباەۆ سايلاندى. ول 2021 جىلعى قاراشادان 2022 جىلعى ماۋسىمعا دەيىن الماتى وبلىسى اكىمى قىزمەتىن اتقاردى. جاڭادان قۇرىلعان مينيسترلىكتىڭ ءبىرى سۋ رەسۋرستارى جانە يرريگاتسيا ءمينيسترى بولىپ نۇرجان نۇرجىگىتوۆ تاعايىندالدى. مەملەكەت باسشىسىنىڭ جارلىعىمەن قانات بيسيمبايۇلى شارلاپاەۆ قر ونەركاسىپ جانە قۇرىلىس ءمينيسترى لاۋازىمىنا تاعايىندالدى. سونداي-اق استانا قالاسى اكىمىنىڭ كومەكشىسى قىزمەتىنە ەرسىن وتەباەۆ كەلدى.