تۇركيا استاناسى انكارا قالاسىندا قازاقتىڭ شەرتپە كۇيىنىڭ "اتاسى", كاسىبي حالىق سازگەرى تاتتىمبەت قازانعاپۇلىنىڭ ەسىمى ۇلىقتالىپ، ەسكەرتكىشى بوي كوتەردى، دەپ حابارلايدى "ادىرنا" ۇلتتىق پورتالى.
انكاراداعى تاتتىمبەت قازانعاپۇلى اتىنداعى ساياباق 2016 جىلى كۇيشىنىڭ 200 جىلدىعىنا اشىلعان. اراعا 7 جىل سالىپ مادەني نىساننىڭ قاق ورتاسىندا كۇي ونەرىنىڭ كلاسسيگىنە ارنالعان ەسكەرتكىش بوي كوتەردى. تۋىندى اۆتورى - مۇرات مانسۇروۆ. 2,5 توننا قولا ەسكەرتكىش قاراعاندى وبلىسى اكىمدىگىنىڭ انكاراعا تارتۋى بولعان.
"بابالارىمىز ۇلىقتاۋ، تاريحىمىزدى ساقتاۋ تەك دوستىقتىڭ بەلگىسى دەپ بىلەمىن. تەك وسىنداي ءىس- شارالارىمىز كوپ بولسىن. ءبىزدىڭ تاتتىمبەت قازانعاپۇلى بابامىز، تۇرىك ەلىنىڭ تورىندە ورىن العانى ۇلكەن قۋانىش، باقىت سىيلايدى", - دەدى قاراعاندى وبلىسى اكىمىنىڭ ورىنباسارى ەربول الىقۇلوۆ.ال ايماق باسشىسى ەنۆەر دەميرەل:
"بۇل جەردە دينا نۇرپەيىسوۆا مەن احمەت بايتۇرسىنۇلىنىڭ ەسىمى بەرىلگەن قوس ساياباق بار. مۇنداي نىساندار حالىقپەن حالىقتى بىرلەستىرىپ، ءبىرىن- ءبىرى جاقسى تانۋدا ۇلكەن ءرول اتقارادى. سوندىقتان وسىنداي جەرلەرىمىزدىڭ سانى ارتا بەرسىن", - دەپ ىقىلاسىن ءبىلدىردى.
تاتتىمبەت قازانعاپۇلىنىڭ ەسىمى ۇلىقتالعان جەردە ارقاشان دا تاتتىمبەت حالىق اسپاپتارى وركەسترى جۇرەدى. بۇل جولى دا، ونەرپازدار انتاليا، انكارا مەن الانياعا بارىپ، جەرگىلىكتى تۇرعىنداردى قازاقتىڭ ءان مەن كۇيىنە بولەمەك."تۇركيا استاناسىندا تاتتىمبەت بابامىزعا ەسكەرتكىش اشىلۋىنىڭ كۋاسى بولدى. ەسكەرتكىشتىڭ اشىلۋى تەك تاتتىمبەت ۇرپاقتارى، قاراعاندى وبلىسى ەمەس، جالپى قازاق ەلىنە دەگەن ۇلكەن قۇرمەت", - دەپ العىسىن جاۋدىردى تاتتىمبەت قازانعاپۇلىنىڭ ۇرپاعى سلاميدەن نۇركەنوۆ.
"ادىرنا" ۇلتتىق پورتالى
ۇقساس جاڭالىقتار
