الماتىدا وقۋشىلاردى جاڭا اۆتوبۋستەرمەن تاسىمالدايتىن "مەكتەپ اۆتوبۋسى" پيلوتتىق جوباسى ءۇش كۇن بۇرىن ىسكە قوسىلدى. بۇگىن دە قوعامدىق كولىكتەر 8258 وقۋشىنى 30 مەكتەپكە تاسىمالدار جاتىر. ايتا كەتەرلىگى، بۇل اۋقىمدى ءارى ماڭىزدى جوبانى ىسكە اسىرۋعا قالا اكىمى ەربولات دوساەۆ تاپسىرعان ەدى. اۆتوبۋستار ءبىلىم باسقارماسىنىڭ كومەگىمەن ساتىپ الىندى. ناقتىراق توقتالساق، ءبىر قوعامدىق كولىكتەگى 50-ءى 21 ورىندىق جانە 40 ورىندىق 50 اۆتوبۋس. پيلوتتىق جوبانى ىسكە قوسۋداعى باستى ماقسات - شالعاي اۋىلداردا تۇراتىن جانە كىشكەنتاي وقۋشىلاردى تاسىمالداۋ.
مىسالى، №210 مەكتەپ-ليتسەيىنە ىقشاماۋداننان 222 بالا تاسىمالدانادى. «بايبەسىك» جانە «ۇلجان-2» ىقشاماۋدانىنان 148 بالا، №200 مەكتەپ-گيمنازياسىنا اباي ساياجايىنان 241 وقۋشىنى تاسىمالدايدى. №162 مەكتەپ-گيمنازياسىنا 175 بالانى «جاس قانات» ىقشاماۋدانىنان، ال №183 جالپى ءبىلىم بەرەتىن مەكتەپكە مەكتەپ اۆتوبۋسى ساياجاي الابىنان جانە «اسقارتاۋ» ىقشاماۋدانىنان 76 وقۋشىنى الىپ كەلەدى.
مەكتەپ اۆتوبۋستارى بارلىق حالىقارالىق قاۋىپسىزدىك ستاندارتتارى مەن تەحنيكالىق تالاپتارعا سايكەس كەلەدى: اپاتتىق شىعۋ، قاۋىپسىزدىك بەلدىكتەرى، مۇمكىندىگى شەكتەۋلى بالالارعا ارنالعان پاندۋس، ءورت قاۋىپسىزدىگى جۇيەسى. الماتى قالاسى اكىمىنىڭ ورىنباسارى اسەم ءنۇسىپوۆا اتاپ وتكەندەي، ءار مەكتەپ بويىنشا مارشرۋتتىق پاراقتار ازىرلەندى. بۇل مەكتەپكە دەيىن جەتكىزۋدى قاجەت ەتەتىن بارلىق بالانى قامتۋ ءۇشىن جاسالادى. «مەكتەپ اۆتوبۋسى» جوباسىنىڭ ەكىنشى كەزەڭىن ىسكە اسىرۋ ءۇشىن الماتى قالاسى قالالىق موبيلدىلىك باسقارماسى 2024 جىلى قالا مەكتەپتەرى ءۇشىن قوسىمشا 50 اۆتوبۋس ساتىپ الۋدى جوسپارلاپ وتىر.
«بۇگىنگى تاڭدا بالالاردى وتىرعىزۋ جانە ءتۇسىرۋ ءۇشىن ارنايى ايالدامالار بار. سول باعىت بويىنشا وقۋشىلارمەن بىرگە ارنايى مۇعالىمدەر دە ەرىپ جۇرەدى. جوبانى ودان ءارى كەڭەيتۋدىڭ ارقاسىندا 12500 بالا قامتىلادى. ءبىزدىڭ باعالاۋىمىزشا، ءدال وسى 1-11 سىنىپقا دەيىنگى بالالارعا مەكتەپكە قاتىناۋ ءۇشىن مەكتەپ اۆتوبۋستارى قاجەت»،-دەدى ول.الماتى قالاسى ءبىلىم باسقارماسىنىڭ باسشىسى ءلاززات جىلقىباەۆانىڭ ايتۋىنشا، قازىر 30 مەكتەپتىڭ بارلىعىندا وقۋشىلاردى تاسىمالداۋعا كەلىسىم-شارت جاسالعان. بۇل ءۇشىن بيۋدجەتتەن 1,4 ملرد تەڭگە قاراستىرىلعان.
«1 قىركۇيەكتەن باستاپ بارلىق اۆتوبۋس ءتيىستى قاۋىپسىزدىك شارالارىن ساقتاي وتىرىپ، بەكىتىلگەن مارشرۋتتار بويىنشا بالالاردى تاسىمالدايدى. «مەكتەپ اۆتوبۋسى» جوباسىن جۇزەگە اسىرۋ وقۋشىلاردىڭ قاۋىپسىزدىگىن قامتاماسىز ەتەدى»، - دەدى ءلاززات اۋەسحانقىزى.
