ەڭ ارزان اۋە كومپانياسى. Fly Arystan قىزمەتىن باستادى

قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ تاپسىرماسىمەن قۇرىلعان Fly Arystan بيۋدجەتتىك اۋە كومپانياسى بۇگىن العاشقى رەيسىن ورىندادى. الماتىدان ۇشىپ شىققان ۇشاق ەلورداعا ساعات ون ءبىر جارىم شاماسىندا قوندى. ايتپاقشى، وتاندىق لوۋكوستەردىڭ العاشقى جولاۋشىلارى ەلورداعا روزا باعلانوۆا اتىنداعى Airbus A320 ۇشاعىمەن ۇشىپ كەلدى.

"نازارباەۆتىڭ تاپسىرماسى ورىندالدى"

العاشقى ۇشاقتى قارسى الۋعا "سامۇرىق قازىنا" ۇلتتىق ءال-اۋقات قورى" اق باسقارما توراعاسى احمەتجان ەسىموۆ، يندۋستريا جانە ينفراقۇرىلىمدىق دامۋ ءمينيسترى رومان سكليار، "ەير استانا" كومپانياسى توبىنىڭ پرەزيدەنتى پيتەر فوستەر كەلدى. العاشقى بولىپ ءسوز العان احمەتجان ەسىموۆ الدىمەن جينالعان قوناقتاردى بۇگىنگى 1 مامىر مەرەكەسىمەن قۇتتىقتادى.

"وسىدان تۋرا جارتى جىل بۇرىن ەلباسىمىز نۇرسۇلتان نازارباەۆ حالىققا ءتيىمدى، ارزان اۋە كومپانياسىن اشۋ تۋرالى تاپسىرما بەرگەن ەدى. سول تاپسىرما بۇگىن ورىندالىپ وتىر. ۇلكەن جۇيەلى جۇمىس اتقارىلدى. ءبىرىنشى ۇشاق الماتىدان ەلوردامىزعا قوندى. بۇگىنگى كۇننەن باستاپ ەندى قازاقستاننىڭ باسقا دا قالالارىنا باعىتتار اشىلادى. بۇگىن ءبىز ءۇشىن ايتۋلى كۇن دەسەك تە بولادى", - دەدى ەسىموۆ.

يندۋستريا جانە ينفراقۇرىلىمدىق دامۋ ءمينيسترى رومان سكليار قازاقستاندا جىل سايىن اۋە جولاۋشىلارىنىڭ سانى ارتىپ كەلە جاتقانىن تىلگە تيەك ەتتى. ماسەلەن، بىلتىر شامامەن 8 ميلليون جولاۋشى تاسىمالدانعان، بۇل 2017 جىلدىڭ كورسەتكىشىنەن 6 پروتسەنتكە ارتىق. مينيستر بۇل پروتسەستەن قازاقستان دا شەت قالماۋى كەرەكتىگىن اتاپ ءوتتى.

بيلەتى ارزان اۋە كومپانياسىنىڭ جوسپارى قانداي

"ەير استانا" كومپانياسى توبىنىڭ پرەزيدەنتى پيتەر فوستەر جۋرناليستەرگە قازاقستاندىق لوۋكوستەردىڭ جوسپارى تۋرالى ايتىپ بەردى. "قازىر بۇل ۇشاق تارازعا، قاراعاندى، ورالعا ۇشادى. وسى ايدا پاۆلودار مەن شىمكەنتكە رەيستەر اشىلادى", - دەدى ول. ونىڭ ايتۋىنشا، الداعى ۋاقىتتا حالىقارالىق رەيستەر اشۋ جوسپارلانىپ وتىر. "وسى جىلدىڭ قازانىندا ءۇشىنشى جانە ءتورتىنشى ۇشاقتاردى العاننان كەيىن حالىقارالىق باعىتتاردى اشۋ جوسپاردا بار. ازىرگە ورتا ازيا، كاۆكاز جانە رەسەيگە ۇشۋدى كوزدەپ وتىرمىز", - دەدى فوستەر. بۇعان قوسا، كەلەسى جىلى جازعى ماۋسىمدا ەلىمىزدىڭ كۋرورتتى ايماقتارىنا دا ۇشاقپەن جەتۋىڭىز مۇمكىن.

"2020 جىلعا جوسپارلاپ وتىرمىز. ىستىقكول مەن الاكول باعىتتارىن قاراستىرىپ جاتىرمىز. بىراق ناقتى داتاسىن ايتا المايمىن", - دەدى ول.

ۇشاقتاعى تاماقتىڭ باعاسى

رۋسلان تاگاەۆ Fly Arystan-نىڭ العاشقى جولاۋشىلارىنىڭ ءبىرى. الماتىدان ۇشىپ كەلگەن فوتوگراف وتاندىق لوۋكوستەردىڭ قىزمەتىنە ءدان ريزا. "بيزنەس كلاسس جوق، ءبارى ءبىر جەردە وتىرادى. تار ەمەس، ورىندىقتارى دا ىڭعايلى، جايلى", - دەيدى ول. ول ۇشاقتا تەگىن تاماق بەرمەيتىنىن، بىراق ءوز اقشاڭا ساتىپ الۋعا بولاتىنىن ايتتى. "ماسەلەن، ىرىمشىكپەن جاسالعان سەندۆيچ پەن شاي 1200 تەڭگە، ال تاۋىق ەتىمەن 1400 تەڭگە تۇرادى. ال شايدىڭ ءوزى قاتەلەسپەسەم 300 تەڭگە، سنيكەرس تە 300 تەڭگە", - دەدى جولاۋشى. ايتۋىنشا، ۇشاق بورتى جولاۋشىلارعا تولى بولعان، اراسىندا اتا-اجەلەر دە، بالالارىن ەرتكەن اتا-انالار دا بار. ايتپاقشى، ۇشاقتىڭ دارەتحاناسى دا تەگىن ەكەن. Fly Arystan – "ەير استانا" اۋە كومپانياسىنىڭ بولىمشەسى. لوۋكوستەر بيلەتتەرى 29 ناۋرىزدان بەرى ساتىلىپ جاتىر. باستاپقىدا الماتىدان تارازعا جانە ورالعا ۇشاتىن رەيستەرگە ساتىلسا، كەيىن نۇر-سۇلتان، قاراعاندى، پاۆلودار جانە شىمكەنت باعىتتارى قوسىلدى. قازاقستاندا بيىل ميلليونعا تارتا جولاۋشى ەكى ەسە ارزان باعامەن ۇشا الادى Fly Arystan اۋە كومپانياسىنىڭ ماركەتينگ جانە ساتىلىم جونىندەگى ديرەكتورى جانار جايلاۋوۆانىڭ ايتۋىنشا، قازىر ەلۋ مىڭعا جۋىق جولاۋشى بيلەت العان. ولاردىڭ 85 پروتسەنتى – سالماعى 5 كەلىدەن اسپايتىن قول جۇگىمەن بيلەت ساتىپ العاندار.

"ماسەلەن، الماتى مەن تاراز اراسىندا بيلەت باعاسى 4 مىڭنان باستالادى. ال الماتىدان نۇر-سۇلتانعا 7 مىڭ تەڭگەدەن، ورالعا 12 مىڭ تەڭگەدەن باستالادى", - دەدى جايلاۋوۆا.

بيىل، ونىڭ ايتۋىنشا، وتاندىق لوۋكوستەر 700 مىڭ ادامدى، كەلەسى جىلى 2,5 ميلليون، ال 2022 جىلى 4 ميلليون جولاۋشىنى تاسىمالداۋدى جوسپارلاپ وتىر. Fly Arystan ۇشاقتارىنىڭ ورتاشا جاسى 6 جىلدى قۇرايدى.