قىزىلوردا قالاسىنىڭ تۇرعىنى قىزىنىڭ نارەستەسىن ساتۋعا ارەكەت جاساعان، دەپ حابارلايدى "ادىرنا" ءتىلشىسى قازاقپاراتقا سىلتەمە جاساپ.
جاعا ۇستاتارلىق بۇل وقيعا الەۋمەتتىك جەلىدە جاريالاندى. قىزىلوردالىق ايەل كامەلەتتىك جاسقا تولماعان قىزىنىڭ ومىرگە الىپ كەلگەن نارەستەسىن ساتپاق بولعان. ءجاسوسپىرىم قىز كافەلەردىڭ بىرىندە داياشى بولىپ جۇمىس ىستەپ جۇرگەن.
قىزىلوردا وبلىستىق پوليتسيا دەپارتامەنتى اتالعان وقيعانىڭ شىن مانىندە ورىن العانىن راستاپ وتىر.
"وسى جىلدىڭ 7 قىركۇيەگىندە تىركەلگەن دەرەك بويىنشا قىلمىستىق كودەكستىڭ 135-بابىنىڭ 1-بولىگىمەن (كامەلەتكە تولماعاندار ساۋداسى دەرەگى بويىنشا) قىلمىستىق ءىس تىركەلىپ، تەرگەپ-تەكسەرۋ جۇرگىزىلۋدە.
قىلمىستىق-پروتسەستىك كودەكسىنىڭ 201-بابىنىڭ تالاپتارىنا سايكەس، تەرگەۋ دەرەكتەرىن جاريا ەتۋگە جول بەرىلمەيدى", - دەپ جازىلعان دەپارتامەنت حابارلاماسىندا.
كامەلەت جاسىنا جەتپەگەن ءجاسوسپىرىمنىڭ جۇكتىلىگى بويىنشا وبلىستىق ءبىلىم باسقارماسى دا تۇسىنىكتەمە بەرىپ، جاعدايدىڭ باقىلاۋعا الىنعانىن ايتتى.
"وقيعا تىركەلگەن ۋاقىتتان باستاپ ءبىلىم ءبولىمىنىڭ قامقورشىلىق قورعانشىلىق فۋنكتسياسىن جۇزەگە اسىراتىن ورگان ماماندارى باقىلاۋعا الدى. وعان قاتىستى ءتيىستى شارالار اتقارىلدى. بۇگىنگى تاڭدا ءسابي كامەلەتكە تولماعان اناسىنىڭ قولىندا ەكەندىگىن جەتكىزەمىز", - دەدى وبلىستىق ءبىلىم باسقارماسىنىڭ ءباسپاسوز قىزمەتى.
باسقا ماتەريالدار
Adyrna.kz ۇلتتىق پورتالىنىڭ ماڭىزدى اقپاراتتارىنا جازىلۋ
سوڭعى جاڭالىقتار تۋرالى حاباردار بولىڭىز