قاراعاندىدا باس ەسەپشى ناۋقاس قىزىن ەمدەتۋ ءۇشىن مەملەكەت قارجىسىن جىمقىرعان

قاراعاندى ​​وبلىسىنداعى بالاباقشالاردىڭ بىرىندە باس ەسەپشىسى جەكە شوتىنا 24 ميلليون تەڭگەدەن استام اقشا اۋدارعانى ايتىلدى، دەپ حابارلايدى "ادىرنا" ءتىلشىسى.  بيۋدجەت قاراجاتىنىڭ ۇرلانۋ فاكتىسىن قر ءىىم ەكونوميكالىق تەرگەۋ دەپارتامەنتىنىڭ ماماندارى انىقتاعان. تەرگەۋ بارىسىندا ولار قارقارالىداعى «ەركەتاي» بالاباقشاسىنىڭ باس ەسەپشىسىنىڭ 2021-2022 جىلدار ارالىعىندا ەكى جىلعا جۋىق بيۋدجەت قاراجاتىن جىمقىرعانى بەلگىلى بولعانى ايتىلدى. بالاباقشانىڭ باس ەسەپشىسى نەگىزسىز جوعارى جالاقى مەن دەمالىس اقىسىن جەكە شوتىنا اۋدارىپ وتىرعان. وسىلايشا، بۇكىل كەزەڭ ىشىندە ول ءوزىنىڭ جەكە شوتىنا 24 196 411 تەڭگە جيناپ ۇلگەرگەنى انىقتالىپ وتىر. باس ەسەپشىنىڭ تۋعاننان ءاۋتيزمنىڭ اۋىر تۇرىنە شالدىققان، ياعني I توپتاعى مۇگەدەك قىزى بار ەكەنى بەلگىلى بولدى. ايەل كىناسىن مويىنداپ، جىمقىرىلعان اقشانى بالاسىنىڭ ەمى مەن بۇرىن الىنعان قارىز، نەسيەلەرىن جابۋعا جۇمساعانىن ايتقان. وبلىستىق ەكونوميكالىق تەرگەۋ دەپارتامەنتىنىڭ اسا ماڭىزدى ىستەر بويىنشا جەدەل ۋاكىلى: "تەرگەۋ بارىسىندا باس ەسەپتى 2021-2022 جىلدار ارالىعىندا بيۋدجەت قارجىسىن جالاقى جانە ەڭبەك دەمالىسىنىڭ اقىسى رەتىندە نەگىزسىز ءوزىنىڭ كارتالارى مەن ەسەپشوتتارىنا اۋدارىپ وتىرعان. قاراعاندى وبلىسىنىڭ قارقارالى اۋداندىق سوتىنىڭ شەشىمىمەن باس ەسەپشى كىنالى دەپ تانىلىپ، 6 جىلعا سوتتالدى. جازاسىن ول قك-ءتىڭ 74-ءىنشى بابىنا سايكەس 5 جىلدان كەيىن وتەيدى.",- دەدى زارينا قۇسمانوۆا. كۇدىكتى 6 جىلعا سوتتالدى. جازاسىن بالاسى 11 جاسقا تولعان سوڭ وتەيدى. مۇنىمەن قوسا ول 24 ملن تەڭگەنى مەملەكەتكە قايتارۋى ءتيىس.