2024 جىلى ۇلىتاۋ وبلىسىندا تۇڭعىش گەولوگيالىق كلاستەر جۇمىسىن باستايدى. قازبا جۇمىستارىنىڭ تەحنيكالىق جانە كادرلىق رەسۋرستارىن بىرىكتىرەتىن جوبا جەكە كومپانيانىڭ ينۆەستيتسيالىق قارجىسىنا جۇزەگە اسىرىلۋدا. قۇرىلىستىڭ جالپى قۇنى شامامەن 7 ملرد.تەڭگەنى قۇرايدى. نىساننىڭ قۇرىلىسى اياقتالعان سوڭ، وندا 150 ادام جۇمىسپەن قامتىلادى.
قۇرىلىس بۇرىنعى «جەزقازعانگەولوگيا» گەولوگيالىق ەكسپەديتسياسىنىڭ اۋماعىندا جۇزەگە اسىرىلادى.
«Kazakhmys Barlau» كومپانياسى قۇرىلىستىڭ ەگجەي-تەگجەيلى جوسپارىن ازىرلەدى، توزىعى جەتكەن جانە اپاتتى عيماراتتاردى بۇزىپ، ول جەرلەردە جۇمىستار جۇرگىزۋدە.
جەزقازعان وڭىرىندە مينەرالدى-شيكىزات قورىن ارتتىرۋ ءۇشىن گەولوگيالىق جۇمىستارعا 2022-2025 جىلدارى شامامەن 11 ملرد تەڭگەدەن استام قارجى بولىنەدى. بۇگىنگى كۇنى ۇلىتاۋ وبلىسى بويىنشا 19 ۋچاسكەدە بارلاۋ جۇمىستارى جۇرگىزىلىپ جاتىر. ول مىندەت «Kazakhmys Barlau» ماماندارىنا جۇكتەلگەن.
«گەولوگيالىق كەشەن – ۇلىتاۋ وبلىسى عانا ەمەس، قازاقستان بويىنشا پايدالى بولماق. سەبەبى بۇل – ەلىمىزدەگى تۇڭعىش ۇلكەن گەولوگيالىق كلاستەر. ەندىگى جىلدىڭ ءبىرىنشى توقسانىندا قۇرىلىسى اياقتالادى دەپ جوسپارلانۋدا. جالپى 150 ورىن جۇمىس ورنى اشىلادى. مىستان باسقا دا وسى وڭىردە كوپتەگەن جەر قازبالارى بار. سونى ارى قاراي جەتىلدىرىپ، عىلىمي جاڭا تاسىلدەردى قولدانۋعا وسى ورتالىق سەپتىگىن تيگىزەدى»،- دەپ اتاپ ءوتتى ۇلىتاۋ وبلىسىنىڭ اكىمى بەرىك ابدىعاليۇلى.
جاڭا جوبانىڭ ءساتتى جۇزەگە اسۋى - قابانباي باتىر ىقشام اۋدانىنىڭ دامۋىنا وڭ اسەرىن تيگىزەدى. قازىردىڭ وزىندە ينۆەستورلاردىڭ قولداۋىمەن ءىرىلى-ۇساقتى ماسەلەلەر شەشىمىن تاۋىپ وتىر. 1 مىڭنان استام تۇرعىنى بار ىقشاماۋداندا ۇيلەردىڭ تەڭ جارىمى كوگىلدىر وتىنعا قوسىلعان. جاقىندا «جايلى مەكتەپ» باعدارلاماسى بويىنشا زاماناۋي ءبىلىم ورداسىنىڭ قۇرىلىسى باستالدى.
«قازىرگى تاڭدا وزدەرىڭىز بىلەسىزدەر، شيكىزاتتىڭ ءبارى نە تەرەڭ ورنالاسقان نەمەسە باسقا ەلەمەنتتەرمەن قوسپا رەتىندە كەلەدى. ونىڭ ءبارىن تەحنولوگيامەن ءبولىپ الىپ شىعۋ ءۇشىن عىلىم كەرەك. ول عىلىمدى وسى جەزقازعان وڭىرىندە دامىتۋ قاجەت. سوندىقتان گەولوگيالىق كلاستەر سونداي ويمەن قۇرىلىپ جاتىر.
بۇل جەردەن وقۋ عيماراتتارى، قىزمەتكەرلەرگە ارنالعان جاتاقحانا، گەوفيزيكالىق زەرتحانا جانە جەر قىرتىسىنىڭ سىنامالارىن ساقتايتىن قويما سالىنادى. وزگە وڭىرلەردەن جانە شەت ەلدەردەن ۇزدىك عالىمدار شاقىرىلادى»، - دەيدى «Kazakhmys Barlau» جشس باس ديرەكتورى عالىم نۇرجانوۆ.




"ادىرنا" ۇلتتىق پورتالى