"85 مىڭ تەڭگەگە ءومىر سۇرۋگە بولادى" دەگەن ۆيتسە-مينيستر ءوز سوزىنە تۇسىنىكتەمە بەردى

85.000 تەڭگەگە ءومىر سۇرۋگە بولادى دەگەن ەڭبەك جانە الەۋمەتتىك قورعاۋ ۆيتسە-ءمينيسترى ولجاس ورداباەۆ استاناداعى ەڭبەك كۇنىنە ارنالعان فورۋمنىڭ اياسىندا ءوز سوزىنە تۇسىنىكتەمە بەردى، دەپ حابارلايدى "ادىرنا" ءتىلشىسى Zakon.kz-كە سىلتەمە جاساپ.  ولجاس ورداباەۆ قازاقستاندا 85 مىڭ تەڭگەگە كۇن كورۋگە بولاتىندىعىن ايتقان ەدى. ونىڭ بۇل مالىمدەمەنى جاساعان ۆيدەوسى الەۋمەتتىك جەلىدە تاراپ، قازاقستاندىقتاردىڭ نارازىلىعىن تۋدىرعانى دا جاسىرىن ەمەس. كەيىن ۆيتسە-مينيستر ءوز سوزىنە تۇسىنىكتەمە بەردى: "مەن قازاقستاندىقتار 85 مىڭ تەڭگەگە ءومىر ءسۇرۋى كەرەك دەپ ايتقان جوقپىن. جوق، ارينە. بۇل مەملەكەت بەلگىلەيتىن ەڭ تومەنگى كەپىلدى دەڭگەي جانە ودان تومەن جۇمىس بەرۋشىلەر جالاقىنى قويا المايدى",-دەدى ۆيتسە-مينيستر. ولجاس ورداباەۆتىڭ ايتۋىنشا، ەڭبەك نارىعىندا جوعارى جالاقى بار، ونىڭ مولشەرى بىلىكتىلىككە، ءبىلىم مەن داعدىلارعا بايلانىستى-مىس. ءمينيستردىڭ ورىنباسارى ءوز سوزىندە دەپۋتات رينات زايتوۆتىڭ "ەڭ تومەنگى جالاقى 300 مىڭ تەڭگەدەن تومەن بولماۋى ءتيىس" دەگەن ۇسىنىسىنا دا پىكىر ءبىلدىردى. "بۇل، بىرىنشىدەن، ەكونوميكالىق كورسەتكىش جانە ونى جالپى ەكونوميستەر قاراستىرۋى كەرەك. دەپۋتاتتىڭ ۇسىنىسى قانشالىقتى شىنايى نەمەسە شىنايى ەمەس ەكەنىن قارجى مينيسترلىگىمەن بىرگە تالقىلاۋ جاقسى بولار ەدى. وعان بيۋدجەت قانشالىقتى تارتا الادى", - دەپ تولىقتىردى ولجاس ورداباەۆ.