قازاقستان ۇلتتىق بانكى ەل تۇرعىندارىنا ينۆەستيتسيالىق قىزمەتپەن بايلانىستى الاياقتىق سحەمالار بارىن مالىمدەدى، دەپ حابارلايدى «ادىرنا» ۇلتتىق پورتالى ۆەدومستۆونىڭ ءباسپاسوز قىزمەتىنە سىلتەمە كورسەتە وتىرىپ.
بۇعان قاتىستى ۇلتتىق بانك وكىلدەرى:«الاياقتار سايتتار مەن ءموبيلدى قوسىمشالار جاسايدى، ۇلتتىق بانكتىڭ رەسمي ينتەرنەت-رەسۋرستارىنىڭ ينتەرفەيسىن كوشىرەدى، سونداي-اق شەنەۋنىكتەردىڭ فوتوسۋرەتتەرىن پايدالانادى، اقشانى قايتارۋعا نەمەسە ينۆەستيتسيا ارقىلى جوعارى تابىس تابۋعا ۋادە بەرەدى»، - دەپ ءتۇسىندىردى.سونىمەن بىرگە، ادامدى كوبىرەك تارتۋ ءۇشىن وزدەرىنىڭ جالعان سايتتارى مەن ءموبيلدى قوسىمشالارىن الەۋمەتتىك جەلىلەردە جانە YouTube-تە جارنامالايدى. ءارتۇرلى الەۋمەتتىك پلاتفورمالارداعى جارنامالىق حابارلامالارعا اۋىسۋ كەزىندە، ءوزىن ۇلتتىق بانكتىڭ وكىلى نەمەسە قۇقىق قورعاۋ ورگاندارىنىڭ قىزمەتكەرى دەپ تانىستىرعان كۇماندى قوڭىراۋلار نەمەسە ەلەكتروندى حاتتار الۋ كەزىندە اباي بولۋ كەرەكتىگىن جەتكىزدى. ۇلتتىق بانكتىڭ مالىمەتىنشە، قازاقستان ۇلتتىق بانكى جەكە تۇلعالارعا قىزمەت كورسەتپەيدى جانە تەلەفون، ەلەكتروندى پوشتا نەمەسە وزگە دە بايلانىس قۇرالدارى ارقىلى جەكە مالىمەت سۇرامايدى. اقشانى قايتارۋ تۋرالى اقپارات جازىلعان سايتتاردا الاياقتىق ارەكەتتىڭ بەلگىلەرى بار.
«ۇلتتىق بانك جەكە تۇلعانىڭ شوتىنا قىزمەت كورسەتپەيدى، جەكە مامىلە جاسامايدى. بۇدان باسقا، ازاماتتاردىڭ اكتيۆتەرىن ينۆەستيتسيالىق باسقارۋعا ارنالعان ۇيىمداردىڭ تىزبەسى قارجى نارىعىن رەتتەۋ جانە دامىتۋ اگەنتتىگىنىڭ رەسمي سايتىندا جاريالانعان، - دەپ اتاپ ءوتتى.سونداي-اق ۇلتتىق بانك قىزمەتكەرلەرى ءموبيلدى قوسىمشالاردى ورناتپاۋدى، جەكە دەرەكتەرىن كورسەتپەۋدى، ۇيالى تەلەفونعا قاشىقتان قول جەتكىزۋگە مۇمكىندىك بەرمەۋدى جانە تەلەفون ارقىلى سويلەسۋ بارىسىندا الىنعان نۇسقاۋلار بويىنشا ءۇشىنشى تۇلعالاردىڭ شوتتارىنا اقشا اۋدارماۋدى ەسكەرتتى. كەڭەس الۋ ءۇشىن ۇلتتىق بانكتىڭ بايلانىس ورتالىعىنا 1477 قىسقا ءنومىرى بويىنشا حابارلاسۋعا بولادى.
«ادىرنا» ۇلتتىق پورتالى
ۇقساس جاڭالىقتار
