قاراعاندى وبلىسىندا ساباقتان كەيىن ۇيىنە قايتپاعان باستاۋىش سىنىپ وقۋشىسىنىڭ اناسى جاۋاپقا تارتىلدى، دەپ حابارلايدى "ادىرنا" ءتىلشىسى Stan.kz اقپارات اگەنتتىگىنە سىلتەمە جاساپ.
قارقارالى اۋداندىق ىشكى ىستەر بولىمىنە ءوڭىر تۇرعىن 29 قىركۇيەك كۇنى ساعات 23:40 شاماسىندا حابارلاسىپ، 10 جاسار قىزىنىڭ جوعالعانىن ايتىپ دابىل قاققان.
اناسىنىڭ ايتۋىنشا مەكتەپ وقۋشىسى تۇستەن كەيىن ساباققا كەتىپ، ساعات 19.00-دە مەكتەپتەن قايتۋى كەرەك بولعان.
"بىراق قىز ۇيىنە ورالماعان. دابىل قاققان ايەل قىزىن ءوزى ىزدەي باستاعانىمەن، ىزدەستىرۋ ناتيجە بەرمەگەن. ايەل پوليتسياعا قىزى جوعالىپ كەتكەننەن كەيىن بەس ساعاتقا كەشىگىپ حابارلاسقان", - دەپ حابارلادى قاراعاندى وبلىستىق پوليتسيا دەپارتامەنتىنىڭ ءباسپاسوز قىزمەتى.
بۇكىل پوليتسيا ءبولىمى ىزدەستىرۋ شاراسىن جۇرگىزىپ، جوعالعان قىزدى تاپقان. 10 جاستاعى ءبۇلدىرشىن مەكتەپكە بارماي، كۇنى بويى قۇربىسىمەن بىرگە بولعانىن انىقتادى. ال ساعات 19.00-دە وقۋشى قىز قۇربىسىنىڭ ۇيىنەن كەتكەننەن كەيىن ونى ەشكىم كورمەگەن. شۇعىل ىزدەستۋرى شارالارىنان كەيىن قىزدى تاپقان.
"جەدەل ىزدەستىرۋ توپتارى ءار ءۇيدى ارالاپ، جەرتولەلەردى، شاتىرلاردى، كارىز قۇدىقتارىن تەكسەردى. ءبىر جارىم ساعاتتان كەيىن قىز امان-ەسەن تابىلدى. ول ۇيگە جاياۋ كەلە جاتقانىن، بىراق جولدا قاتتى جاڭبىر جاۋا باستاعانىن ايتتى. جاۋىندا قالماس ۇشىن دومبىرا ەسكەرتكىشىندەگى قۋىستا كۇتكەن. سول جەردە جايعاسىپ، ۇيىقتاپ قالعان", - دەپ قوستى پوليتسيا.
جوعالعان قىزدى ارنايى ماماندار تەكسەرىستەن وتكىزدى. ءبۇلدىرشىن پسيحولوگپەن سويلەسكەننەن كەيىن ءوز اناسىنا قايتارىلدى. مەكتەپ وقۋشىسىنىڭ اناسىنا قاتىستى وبلىستىق اقبتك-ءنىڭ 127-بابى "كامەلەتكە تولماعان بالانى تاربيەلەۋ جانە (نەمەسە) وقىتۋ، قۇقىقتارى مەن مۇددەلەرىن قورعاۋ جونىندەگى مىندەتتەردى ورىنداماۋ" بويىنشا اكىمشىلىك حاتتاما تولتىرىلدى.
