الەۋمەتتىك جەلىدە كسرو ىدىراعاننان كەيىن اقش پرەزيدەنتتەرىنىڭ ءبىر دە ءبىر رەت قازاقستانعا كەلمەگەنى ءسوز ەتىلدى، دەپ حابارلايدى "ادىرنا".
وتكەن اپتادا اقش-تىڭ قازاقستانداعى ەلشىسى دەنيەل روزەنبليۋم اق ءۇي باسشىسى دجو بايدەننىڭ قازاقستانعا كەلۋى مۇمكىن ەكەندىگىن ايتتى.
«مۇنداي بولجام بار ەكەنى ايتقىم كەلەدى. قازاقستانعا ورتالىق ازيا ەلدەرى تاراپىنان جانە اقش-تىڭ جوعارى بيلىگىنەن دە ۇلكەن قىزىعۋشىلىق بار. سوندىقتان دا، بولجام بار" دەدى روزەنبليۋم.
سونداي-اق ول، ازاماتتارى يمميگراتسيالىق ەمەس ۆيزا ارقىلى 10 جىل اقش-تا تۇراقتاي الاتىن ورتالىق ازياداعى جالعىز ەل قازاقستان ەكەنىن اتادى. بۇل ەكى ەلدى دۇرىس قارىم-ۇاتىناستا ەكەندىگىنىڭ ناتيجەسى ەكەندىگىن قوسا كەتتى.
ەسكە سالا كەتەيىك، 19 قىركۇيەكتە بۇۇ باس اسسامبلەياسىنىڭ الاڭىندا ورتالىق ازيا ەلدەرىنىڭ پرەزيدەنتتەرى مەن دجو بايدەننىڭ كەزدەسۋى ءوتتى. الدىمەن پرەزيدەنتتەر سۋرەتكە ءتۇسىپ، كەلىسسوز ۇستەلىنە وتىردى. سامميتتە ءبىرىنشى بولىپ ءسوز سويلەگەن دجو بايدەن بولدى. ول ورتالىق ازيانىڭ ەگەمەندىگى مەن گۇلدەنۋىن نىعايتۋ ءۇشىن قالاي بىرلەسىپ جۇمىس ىستەي الاتىنى تۋرالى ارىپتەستەرىنىڭ پىكىرلەرىن قۇپتادى. اتاپ ايتقاندا، بايدەن شەكارا قاۋىپسىزدىگى، تەرروريزمگە قارسى كۇرەس جانە قۇقىق قورعاۋ سالاسىنداعى ىنتىماقتاستىقتى جالعاستىرۋعا ۋادە بەردى.
