ەلوردا اتىنان سىنعا تۇسەتىن ازيا ويىندارى مەن حالىقارالىق مەكتەپ وليمپيادالارىنىڭ جۇلدەگەرلەرى رەسپۋبليكا كۇنى قارساڭىندا جەڭىس تۇعىرىندا قازاقستان تۋىن كورگەندەگى سەزىمدەرى تۋرالى ايتىپ بەردى، دەپ حابارلايدى استانا اكىمدىگىنىڭ رەسمي سايتى.
XIX جازعى ازيا ويىندارىنىڭ جەڭىمپازى نۇرجان باتىربەكوۆ ءوز ەلىنىڭ تۋىن كوتەرۋ – ءاربىر سپورتشىنىڭ ماقساتى مەن ارمانى ەكەنىن تىلگە تيەك ەتتى.
ونىڭ بۇل پىكىرىن XIX جازعى ازيا ويىندارىنىڭ كۇمىس جۇلدەگەرى گالينا دۋۆانوۆا دا راستادى.
«ەرەكشە سەزىمگە بولەنگەنىم راس. ەلىمىزدىڭ نامىسىن قورعاپ، فينالعا شىققانىم ءۇشىن قۋانىشتان كوزىمە جاس كەلدى. سىنعا ءتۇسىپ، قازاقستاننىڭ سپورتى دامىپ كەلە جاتقانىن كورسەتەمىن»، - دەيدى سپورتشى.
ەلوردالىق مەكتەپتىڭ وقۋشىسى، بيولوگيا بويىنشا حالىقارالىق وليمپيادانىڭ جۇلدەگەرى عالىمجان باقتىباي الەمدىك دەڭگەيدەگى زياتكەرلىك تۋرنيردە ۇزدىكتەردىڭ قاتارىنا كىرگەنىن بىردەن تۇسىنبەگەنىن جانە ءوز ەلىنىڭ نامىسىن قورعاي العانىن ماقتان تۇتاتىنىن اتاپ ءوتتى.
«قازاقستان اتىنان وليمپياداعا قاتىسۋ جانە قازاقستاننىڭ نامىسىن حالىقارالىق ارەنادا قورعاۋ مەن ءۇشىن ۇلكەن جەتىستىك. مەن ءوز ەلىمنىڭ اتىنان حالىقارالىق وليمپيادالارعا قاتىسا الاتىنىما قۋانامىن»، - دەپ اتاپ ءوتتى ونىڭ كوماندالاسى دانا امانگەلدى.
«قازىر قازاقستان حالىقارالىق وليمپيادالار بويىنشا رەيتينگتىڭ باسىندا تۇر. ءبىزدىڭ قاتىسۋشىلار قاشاندا جۇلدەلى ورىندارعا يە بولادى جانە التىن مەن كۇمىستى جيىرەك الادى. وتكەن جىلدارمەن سالىستىرعاندا بۇل ۇلكەن جەتىستىك»، - دەيدى ينفورماتيكا بويىنشا حالىقارالىق وليمپيادانىڭ جۇلدەگەرى سەرىكباي نۇرالى.
باسقا ماتەريالدار
Adyrna.kz ۇلتتىق پورتالىنىڭ ماڭىزدى اقپاراتتارىنا جازىلۋ
سوڭعى جاڭالىقتار تۋرالى حاباردار بولىڭىز