ەگيپەتتە وتكەن كادەتتەر اراسىنداعى شاحماتتان الەم چەمپيوناتىندا 10 جاستاعى دانيس قۋاندىقۇلى التىن مەدال جەڭىپ الدى. بۇل تۋرالى جانسايا ابدىمالىك شاحمات اكادەمياسىنىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
«2023 جىلعى 16-26 قازان ارالىعىندا شارم-ەل-شەيح قالاسىندا «8, 10 جانە 12 جاسقا دەيىنگى» جاس ساناتتارىندا شاحماتتان الەم چەمپيوناتى ءوتتى. بۇل تۋرنير جاس شاحماتشىلار ءۇشىن نەگىزگى جانە ەڭ بەدەلدى جارىس بولىپ تابىلادى. جانسايا ابدىمالىك شاحمات اكادەمياسىنىڭ «سپەتس» توبىنىڭ وقۋشىسى، دانيس قۋاندىقۇلى «10 جاسقا دەيىن» جاس ساناتىندا ونەر كورسەتتى»،—دەلىنگەن حابارلامادا.
11 تۋردىڭ قورىتىندىسى بويىنشا جاس شاحماتشى 9 ۇپاي جيناپ، 7 جەڭىسكە قول جەتكىزدى، 4 رەت تەڭ وينادى.
«دانيس قۋاندىقۇلىنىڭ جەتىستىگى قازاقستاندىق شاحمات ءۇشىن تاريحي بولىپ تابىلادى، ويتكەنى ۇلدار مۇنداي دەڭگەيدەگى جارىستاردا ەشقاشان الەم چەمپيونى اتانعان ەمەس. قورىتىندى كەستەدە دانيس اقش، رەسەي جانە قىتايدان كەلگەن ەڭ مىقتى شاحماتشىلاردان اسىپ ءتۇستى.
دانيس اكادەميادا 5 جاسىنان باستاپ بىزدە وقيدى، سپورت شەبەرىنە كانديدات، ءوزىنىڭ جاس ساناتىندا الماتى مەن قازاقستاننىڭ قازىرگى چەمپيونى بولىپ تابىلادى»،—دەپ تولىقتىردى شاحمات اكادەمياسى.
