قاراعاندى وبلىسىنداعى شاحتادا بولعان اپاتقا بايلانىستى ەكس-پرەزيدەنت نۇرسۇلتان نازارباەۆ پەن “Aرسەلورميتتال Tەمىرتاۋ” (AMT) كومپانياسىنىڭ نەگىزگى ينۆەستورى لاكشمي ميتتال كوڭىل ايتپادى، دەپ حابارلايدى “ادىرنا” ۇلتتىق پورتالى.
تۇڭعىش پرەزيدەنت سوڭعى رەت ەل كوزىنە 11 ماۋسىم كۇنى اباي وبلىسىنداعى ورتتەن قازا تاپقان ورمان شارۋاشىلىعى قىزمەتكەرلەرىنىڭ وتباسىنا كوڭىل بىلدىرگەندە شىققان. سودان بەرى قايدا، نە ىستەپ جۇرگەنى بەلگىسىز.
ال قازاقستاندا “Aرسەلورميتتال Tەمىرتاۋ” (AMT) كومپانياسىنىڭ نەگىزگى ينۆەستورى لاكشمي ميتتالدى قىلمىستىق جاۋاپكەرشىلىككە تارتۋدى تالاپ ەتەتىن پەتيتسياعا قول جيناۋ باستالدى.
قازاقستان پرەزيدەنتى قاسىم-جومارت توقاەۆتىڭ اتىنا قايىرىلعان پەتيتسيا اۆتورلارى سوڭعى 15 جىلدا اتالعان نىساندا 100-دەن استام ادام قازا تاپقانىنا توقتالىپ، بۇل كورسەتكىشتىڭ جىل وتكەن سايىن ارتىپ جاتقانىن باسا ايتقان.
ء“بىز، پەتيتسياعا قول قويعان ازاماتتار، "ارسەلورميتتال تەمىرتاۋ" كومپانياسىنىڭ قوجايىنى لاكشمي ميتتال مەن مەنەدجەرى پالاۆاتحا كريشناننىڭ قىزمەتكەرلەردىڭ قاۋىپسىزدىگىن قامتاماسىز ەتۋدە ارەكەتسىزدىككە بارعانى ءۇشىن قىلمىستىق جاۋاپكەرشىلىككە تارتۋدى تالاپ ەتەمىز! سونداي-اق كومپانياداعى ەڭبەك جاعدايىن تەكسەرۋى ءتيىس مەملەكەتتىك قىزمەتكەرلەردى دە ەستەن شىعارماۋ كەرەك!”، – دەلىنگەن قۇجاتتا.
پەتيتسيا اۆتورلارى سونىمەن قوسا سوڭعى 5 جىلدا "ارسەلورميتتال تەمىرتاۋ" كومپانياسىنىڭ تابىسى 1 ترلن تەڭگەنى قۇراعانىن ايتادى.
شاحتاداعى اپاتقا كوڭىل بىلدىرگەندەر كىمدەر؟
قاسىم-جومارت توقاەۆتىڭ اتىنا قاراعاندى وبلىسىنداعى كەن ورنىندا بولعان اپات سالدارىنان كوپتەگەن ادامنىڭ قازا تابۋىنا بايلانىستى شەت مەملەكەتتەردىڭ باسشىلارىنان، سونداي-اق حالىقارالىق ۇيىمداردىڭ جەتەكشىلەرىنەن كوڭىل ايتۋ جەدەلحاتتارى كەلۋدە.
قىتاي حالىق رەسپۋبليكاسىنىڭ توراعاسى سي تسزينپين قايعىلى وقيعاعا بايلانىستى پرەزيدەنت قاسىم-جومارت توقاەۆقا جانە قازاقستان حالقىنا كوڭىل ايتتى.
«قازاقستاننىڭ قاراعاندى وبلىسىنداعى شاحتادا بولعان اپات سالدارىنان كوپتەگەن ادامنىڭ قازا تاپقانى تۋرالى سۋىت حاباردى تەرەڭ كۇيزەلىسپەن قابىلدادىم. قىتاي ۇكىمەتىنىڭ جانە حالقىنىڭ، سونداي-اق ءوزىمنىڭ اتىمنان قايتىس بولعان ازاماتتاردىڭ وتباسىلارى مەن جاقىن تۋىستارىنا قايعىرىپ كوڭىل ايتامىن»، – دەپ جازىلعان جەدەلحاتتا.
فرانتسيا پرەزيدەنتى ەممانۋەل ماكرون كوستەنكو شاحتاسىنداعى اپاتقا بايلانىستى قازاق تىلىندە كوڭىل ايتتى.
سونداي-اق، كوڭىل ايتۋ جەدەلحاتتارىن بولگاريا پرەزيدەنتى رۋمەن رادەۆ، ارمەنيا پرەزيدەنتى ۆااگن حاچاتۋريان، بوسنيا جانە گەرتسەگوۆينا پرەزيديۋمىنىڭ توراعاسى جەلكا تسۆيانوۆيچ، اوسشك باس حاتشىسى قايرات سارىباي، ۇجىمدىق قاۋىپسىزدىك شارتى جايلى ۇيىمنىڭ (ۇقشۇ) باس حاتشىسى يمانعالي تاسماعامبەتوۆ جانە رەسەي پرەزيدەنتى ۆلاديمير پۋتين، بەلارۋس پرەزيدەنتى الەكساندر لۋكاشەنكو دە جولدادى.
