الماتىنىڭ ارنايى ەكونوميكالىق ايماعىنا 50 ملرد تەڭگەدەن استام ينۆەستيتسيا تارتىلدى

الماتىدا «يتپ» اەا كاسىپورىنىندا 6,7 مىڭنان استام جۇمىس ورنى اشىلدى. الاتاۋ شاعىناۋدانىنداعى «يننوۆاتسيالىق تەحنولوگيالار پاركى» ارنايى ەكونوميكالىق ايماعى قۇرىلعان ساتتەن باستاپ 6 727 جۇمىس ورنىن قۇرىلدى، 50,69 ملرد تەڭگە ينۆەستيتسيا تارتىلدى، 34,7 ملرد. تەڭگەنىڭ سالىق جانە بيۋدجەتكە تولەنەتىن باسقا دا تولەمدەر تولەندى، 493,7 ملرد تەڭگەنىڭ ءونىمى ءوندىرىلىپ، قىزمەتتەر كورسەتىلدى، ەكسپورت كولەمى 7,46 ملرد تەڭگەگە جەتتى، دەپ حابارلايدى «ادىرنا» ءتىلشىسى Almaty.tv-عا سىلتەمە جاساپ. بۇگىندە «يتپ» اەا رەزيدەنتتەرى 160 كومپانيا، ونىڭ ىشىندە باعدارلامالىق قامتاماسىز ەتۋدى ازىرلەۋ سالاسىنداعى 105 كومپانيا قىزمەتىن «ەكساۋماقتىق» قاعيداتى بويىنشا جۇزەگە اسىرادى، 55 كومپانيا «يتپ» اەا اۋماعىندا ورنالاسقان. 2023 جىلى «يتپ» اەا-عا 15 ملرد تەڭگە كولەمىندە ينۆەستيتسيا تارتىلىپ، 1200 جۇمىس ورنى اشىلىپ، 39 كومپانيا جاڭا قاتىسۋشى رەتىندە قابىلداندى، جوبالاردى ىسكە اسىرۋ ءۇشىن اۋدانى 15 گا 7 جەر تەلىمى ءبولىندى. «يتپ» اەا الماتى قالاسىنىڭ مەدەۋ اۋدانىندا 163 گا اۋماقتا ورنالاسقان. مەملەكەت بارلىق ينجەنەرلىك-كوممۋنالدىق ينفراقۇرىلىمنىڭ، سونىمەن قاتار، ءبىرىنشى كەزەكتەگى عيماراتتاردىڭ، اكىمشىلىك عيماراتتىڭ قۇرىلىسىن جۇزەگە اسىردى. «يتپ» اەا قاتىسۋشىلارىنا سالىق جانە كەدەندىك جۇكتەمەنى تومەندەتۋدە ءتۇرلى ارتىقشىلىقتار مەن جەڭىلدىكتەر بەرىلەدى. «يتپ» اەا اۋماعىنداعى نەگىزگى باسىم قىزمەت تۇرلەرى IT, تەلەكوممۋنيكاتسيا جانە بايلانىس، ەلەكترونيكا، جاڭارتىلاتىن ەنەرگيا كوزدەرى، رەسۋرستاردى ۇنەمدەۋ جانە تابيعاتتى ءتيىمدى پايدالانۋ، سونىمەن بىرگە، 2020 جىلدان باستاپ فارماتسەۆتيكا جانە مەديتسينالىق بۇيىمدار كىردى.