شىمكەنت قالاسىنا بيىلدىڭ 9 ايىندا 434,3 ملرد تەڭگە ينۆەستيتسيا تارتىلعان. بۇل 2022 جىلدىڭ ءتيىستى كەزەڭىمەن سالىستىرعاندا 26,9 پايىزعا جوعارى. جىل سوڭىنا دەيىن قالا ەكونوميكاسىنا 721,7 ملرد تەڭگە ينۆەستيتسيا تارتۋ جوسپارلانۋدا. بۇل كورسەتكىش تە 2022 جىلمەن سالىستىرعاندا 32 پايىزعا ارتادى.
بۇل تۋرالى شىمكەنت قالاسى اكىمدىگى كاسىپكەرلىك جانە يندۋستريالدى-يننوۆاتسيالىق دامۋ باسقارماسىنىڭ باسشىسىنىڭ ورىنباسارى ەرمەك تۇرمانوۆ مالىمدەدى.
ونىڭ ايتۋىنشا، وڭدەۋ ونەركاسىبىندەگى ءوندىرىس كولەمى 672,3 ملرد. تەڭگەنى قۇراعان. مۇناي-گاز-حيميا ونىمدەرىن وندىرەتىن كاسىپورىندار ەسەپتى كەزەڭدە 41,3 مىڭ توننا ءونىم شىعاردى.
سونىمەن قاتار باسقارمانىڭ مالىمەتتەرىنە سۇيەنسەك، شىمكەنت قالاسىندا 2023-2027 جىلدارى جۇزەگە اسىرىلاتىن جالپى قۇنى 1,8 ترلن تەڭگەنى قۇرايتىن 275 ينۆەستيتسيالىق جوبانىڭ پۋلى جاساقتالعان. بۇل جوبالاردىڭ ورىندالۋى جاڭادان 32 مىڭنان استام جۇمىس ورىندارى اشۋعا مۇمكىندىك بەرەدى.
–بيىل قۇنى 128 ملرد. تەڭگەنى قۇرايتىن 48 ينۆەستيتسيالىق جوبا ىسكە اسىرىلىپ، 3 108 جاڭا جۇمىس ورنىن اشۋ جوسپارلانىپ وتىر. بۇگىنگى تاڭدا اتالعان جوبالاردىڭ ىشىندە جالپى قۇنى 40 ملرد. تەڭگەنى قۇرايتىن 20 ينۆەستيتسيالىق جوبا ىسكە اسىرىلىپ، وندا 1 183 جاڭا جۇمىس ورنى پايدا بولدى. قالا ەكونوميكاسىنا ينۆەستيتسيا تارتۋ كەزىندە، اسىرەسە، وڭدەۋ ونەركاسىبى سالاسىنا ەرەكشە نازار اۋدارىپ وتىرمىز. بۇل سەكتوردا 2027 جىلعا دەيىن جالپى قۇنى 401,5 ملرد تەڭگەنى قۇرايتىن 103 ينۆەستيتسيالىق جوبا ىسكە اسادى. اتالعان كاسىپورىنداردا 10 مىڭنان استام ادام تۇراقتى جۇمىسپەن قامتىلادى. سونىڭ ىشىندە بيىل جالپى قۇنى 14,4 ملرد تەڭگەگە 14 ينۆەستيتسيالىق جوبانى ىسكە اسىرىپ، 605 جاڭا جۇمىس ورنىن قۇرۋ جوسپارلاندى. قازىردىڭ وزىندە وڭدەۋ ونەركاسىبى سالاسىندا 3 ينۆەستيتسيالىق جوبا ىسكە اسىرىلىپ ۇلگەردى، – دەيدى ە.تۇرمانوۆ.
ايتا كەتەيىك، قالا اۋماعىندا جالپى اۋماعى 869 گەكتاردى قۇرايتىن 5 ونەركاسىپتىك ايماق جۇمىس ىستەيدى. بۇگىنگى تاڭدا 358 ملرد. تەڭگە سوماسىنا 337 جوبا ىسكە اسىرىلۋدا. ونىڭ ىشىندە بۇگىنگى تاڭعا 216 ملرد تەڭگەنى قۇرايتىن 273 جوبا ىسكە قوسىلىپ، 8 مىڭنان استام جاڭا جۇمىس ورنى قۇرىلعان.10:28
