مەملەكەت باسشىسى قاسىم-جومارت توقاەۆ ەنەرگەتيكا ءمينيسترى الماسادام ساتقاليەۆتى قابىلدادى، - دەپ حابارلايدى "ادىرنا" ءتىلشىسى اقوردا سايتىنا سىلتەمە جاساپ.
قاسىم-جومارت توقاەۆقا ەنەرگەتيكا سالاسىن دامىتۋدىڭ نەگىزگى ماسەلەلەرى جانە ەلىمىزدىڭ وتىن-ەنەرگەتيكا كەشەنىنىڭ 2023 جىلدىڭ 10 ايىنداعى كورسەتكىشتەرى، سونداي-اق ءىرى مۇناي-گاز جانە ەنەرگەتيكالىق جوبالاردى ىسكە اسىرۋ بارىسى تۋرالى باياندالدى.
كەزدەسۋ بارىسىندا الماسادام ساتقاليەۆ اتالعان كەزەڭ ىشىندە قازاقستانداعى مۇناي ءوندىرۋ كولەمى 74,8 ميلليون توننانى، ال مۇناي ونىمدەرىنىڭ ءوندىرىسى 11,2 ميلليون توننانى قۇراعانىن جەتكىزدى. سونىمەن قاتار 48,7 ميلليارد تەكشە مەتر گاز، 93,5 ميلليارد كۆت/cاع ەلەكتر قۋاتى جانە 15,35 مىڭ توننا ۋران وندىرىلگەن.
قاسىم-جومارت توقاەۆقا ۇلتتىق ەلەكتر جەلىسىن دامىتۋ ءۇشىن اتقارىلىپ جاتقان شارالار، بيىل ماۋسىم ايىندا ىسكە قوسىلعان ەلەكتر ەنەرگياسىن نارىقتا ساتۋدىڭ جاڭا مەحانيزمى جونىندە باياندالدى.
مەملەكەت باسشىسىنا قىسقى جىلىتۋ ماۋسىمى قالىپتى ءوتۋ ءۇشىن قوسىمشا باقىلاۋ ورناتىلعانى تۋرالى اقپارات بەرىلدى. اتاپ ايتقاندا، ەنەرگەتيكا نىساندارىن قامتاماسىز ەتۋ ماقساتىندا 5,5 ميلليون توننا كومىر مەن 100 مىڭ توننا مازۋت قورى دايىندالعان.
بۇعان قوسا مەملەكەت باسشىسىنا ۆەدومستۆونىڭ ەل ايماقتارىنا ودان ءارى گاز قۇبىرىن تارتۋ جوسپارى تانىستىرىلدى.
كەزدەسۋ سوڭىندا پرەزيدەنت جىلىتۋ ماۋسىمىنىڭ بارىسىن جانە ەنەرگەتيكا ينفراقۇرىلىمىن جاڭعىرتۋ جوبالارىنىڭ ىسكە اسىرىلۋىن ايرىقشا باقىلاۋدا ۇستاۋدى، سونداي-اق ىشكى نارىقتى جانار-جاعارمايمەن جانە سۇيىتىلعان مۇناي گازىمەن ۇزدىكسىز قامتاماسىز ەتۋ شارالارىن قابىلداۋدى تاپسىردى.
ۇقساس جاڭالىقتار
