جالپى، ءدىندى قازىرگى قازاق يدەولوگياسىنا اينالدىرۋ دەگەننىڭ ءوزى ابسۋرد. قازاقستان دا، تۇركى الەمى دە ءوز تەحنولوگيالىق دامۋ جولىن ىزدەۋ ۇستىندە.
جەردى يگەرۋ، قازبا بايلىقتى وڭدەۋ، ونەركاسىپتى دامىتۋ - ەڭ الدىمەن عىلىمدى تالاپ ەتەدى... سوندىقتان، بۇگىنگى وركەنيەت وسى باعىتتا داميدى. سودان بولار، بۇگىنگى الەمدە ۇلتتىق يدەنتيفيكاتسيا "ۇلتسىزدانعان ءدىن" نەگىزىنە ەمەس، ۇلتتىق مادەنيەتكە قاراي بۇرىلىپ بارادى ما دەيمىن... الەم يۋنەسكو ارقىلى وسى ءپرينتسيپتى العا شىعاردى. مۇندا ەشبىر دىنگە باسىمدىق جوق. ال ءار ۇلتتىڭ مادەنيەتى، سالت-ءداستۇرى، ونەرى، مۋزىكاسى، تاريحى - قازىر بۇكىل ادامزاتقا ورتاق قۇندىلىق دەپ مويىندالۋدا جانە اتاپ وتىلۋدە، ءارى، قورعالۋدا. وسىعان ساي ء"وزىن ءوزى تانىعان حالىق" دەپ ءوز مادەنيەتىن، ءوز عىلىمىن ساقتاپ، ونى دامىتۋشى ەلدەردى ايتادى.
...ال ءوز ءتىلى بولا وتىرىپ، وزگە تىلدە قۇدايعا جالبارىناتىن حالىقتار، ەندى "يمپەريالىق بوداندىق سىرقاتىنان" اجىراي الماعان ءالسىز نە ءالجۋاز ۇلت قاتارىندا قالىپ قويعاندار دەگەن تۇسىنىك قالىپتاستى. ولاردىڭ وزگەگە جۇتىلۋ قاۋپى الدەقايدا جوعارى. سەبەبى كوممۋنيكاتسيا دامۋى ونى جىلدامداتادى. ونداي ۇلتتاردى جاۋلاۋ قاجەت تە ەمەس. ونداي حالىقتى "الىستا وتىرىپ باسقارۋعا" بولادى. اقشانىڭ كۇشىمەن، ولاردىڭ ساناسىن دىنمەن ۋلاۋ ارقىلى، ءوز مادەنيەتىن ۇمىتتىرۋ ارقىلى، ءدىني فاناتتار مەن سودىرلار ارقىلى...
ەگەر ۇلتتىڭ ءوزى وسىنى قالاپ تۇرسا - ماسەلەنى وتە از شىعىنمەن، ارزان شەشۋگە بولادى. ال، ەگەر ولاردىڭ باسشىسى ءھام ەليتاسى وسىنى قالاپ تۇرسا، وندا تىپتەن جاقسى! وندا، ولاردى "يمپەريالىق ورتالىققا" (مىسالى دۋبايعا، ستامبۋلعا، شۆەيتساريا، لوندون، نيۋ-يورك..، ساۋد ارابياسىنا ت.ت) كوشىرىپ الىپ، سولار ارقىلى ۇلتتى زومبيلاندىرۋدى جالعاستىرسا - بۇل دەگەن تىپتەن تاماشا ءتاسىل! ال ۇلت ىشىندەگى وسىنى تۇسىنگەن ءوز زيالىلارىن جان-جاقتى شەكتەۋ، ولاردى مەملەكەتتەن ءبولۋ - وسى "ۇلتتى جۇتىپ الۋ، ونى قۇلدىق سانادا ۇستاۋ" سەكىلدى ارەكەتتىڭ ءبىر بولىگى ءارى وتە ءتيىمدى بولىگى بولىپ تابىلادى.
ال شەت ەلدە تۇراتىن "ساتقىن ەليتا" ول ۇلتتى ۇشاقپەن ۇشىپ بارىپ تا باسقارادى...
مىسالى، ولاردىڭ ەلدە باۋىرى قايتسا - دۋبايدان ۇشىپ كەلە سالادى، سوسىن كەرى قايتادى دەگەندەي...
ينتەرنەتپەن دە وتىرىپ باسقارادى...
جالپى، مۇنداي تەندەنتسيا قازىرگى ءبىزدىڭ ەلدە بايقالماي ما؟
قالاي ويلايسىزدار؟
ءابدىراشيت باكىرۇلى،
فيلوسوف-پۋبليتسيست
