حالىقتىڭ دەرەكتەر بازاسىنىڭ كورسەتكىشتەرىنە سايكەس، 2023 جىلعى 14 قاراشادا ساعات 08:10-دا تۋعان 5 بالا ەلىمىزدىڭ 20 ميلليونىنشى تۇرعىنى بولدى.
ولاردىڭ اراسىندا ۇلىتاۋ وبلىسىنداعى سەيتجان وتباسىنىڭ پەرزەنتى توميريس تە بار.
بۇگىن جاس انا ايگەرىم مولداشەۆانى قۇتتىقتاۋ ءۇشىن وبلىس اكىمىنىڭ مىندەتىن اتقارۋشى ۇلانتاي ۇسەنوۆ، قالا اكىمى قايرات شايجانوۆ، قالالىق ءماسليحات توراعاسى راۋشان كاپاروۆا ارنايى باردى. ءتوميريستىڭ اناسىنا مەملەكەت باسشىسىنىڭ، ۇلىتاۋ وبلىسىنىڭ جانە جەزقازعان قالاسى اكىمدەرىنىڭ اتىنان ارنايى سىيلىقتار تابىستالدى.
سونىمەن قاتار، ايتۋلى وقيعانىڭ قۇرمەتىنە وراي جاس وتباسىعا «وتباسى بانك» اق-نان 2 ملن تەڭگە سوماسىندا سەرتيفيكات تابىستالدى.
قازىرگى ۋاقىتتا جاس كەلىنشەكتىڭ جاعدايى جاقسى. ءبۇلدىرشىننىڭ سالماعى 3 كەلى بولسا، بويى 49 سم. ايگەرىم مولداشەۆانىڭ ايتۋىنشا، قىزدىڭ ەسىمىن اتاسى تاڭداعان.
قالا اكىمى اكىمدىك اتىنان 20 ميلليوندىق قازاقستاندىق ەسەبىن باستايتىن سابيلەردى دە قۇتتىقتاپ، ەستەلىك سىيلىقتار تارتۋ ەتتى.
