شانحاي ىنتىماقتاستىق ۇيىمنىڭ باقىلاۋشىلارى التى ايماقتى باقىلايتىن بولادى
شانحاي ىنتىماقتاستىق ۇيىمنىڭ باس حاتشىسى ۆلاديمير نوروۆ باستاعان بايقاۋشىلار توبى سايلاۋدى باقىلاۋ ءۇشىن ەلورداعا كەلدى، دەپ حابارلايدى Sputnik قازاقستان تىلشىسى.
ونىڭ ايتۋىنشا، شىۇ ميسسياسى 25 ادامنان تۇرادى. ولاردىڭ دەنى – ۇيىمعا مۇشە مەملەكەتتەردىڭ زاڭ شىعارۋشى، اتقارۋشى جانە سايلاۋ ورگاندارىندا جۇمىس ىستەيتىن قىزمەتكەرلەر.
شىۇ ميسسياسى قاي قالالاردا جۇرەدى
ء"بىزدىڭ ميسسيامىز باقىلاۋ شارالارىن باستاپ كەتتى دەۋگە بولادى. قازىرگى كەزدە ولار سايلاۋعا دايىندىق ماسەلەلەرىن قاداعالاپ ءجۇر. ۇيىمنىڭ وكىلدەرى قازاقستاننىڭ جەتى قالاسىنا جىبەرىلدى. ولاردىڭ ىشىندە نۇر-سۇلتان، الماتى، شىمكەنت، تۇركىستان، قاراعاندى، اتىراۋ مەن وسكەمەن بار. بۇدان بولەك، وسى قالالار كىرەتىن التى ايماقتى قامتيمىز", - دەدى نوروۆ ورتالىق سايلاۋ كوميسسياسىندا وتكەن بيرفينگتە. شىۇ باقىلاۋشىلارى 7 ماۋسىمدا سايلاۋدى ۇيىمداستىرۋ شارالارىنا قاداعالاۋعا تولىعىمەن كىرىسەدى. ال 9 ماۋسىمدا داۋىس بەرۋدى جان-جاقتى باقىلايدى."ارينە، قازاقستاننىڭ سايلاۋ زاڭناماسىندا كوپ جاڭالىقتار ەنگىزىلدى. ونداي تاجىريبە شانحاي ىنتىماقتاستىق ۇيىمىنا مۇشە مەملەكەتتەر ءۇشىن ۇلگى بولادى دەپ سەنەمىز. قازاقستاندا ايەل ادام العاش رەت پرەزيدەنتتىك سايلاۋدا ءوز كانديداتۋراسىن ۇسىنىپ وتىر. سوسىن ءاربىر كانديداتتىڭ سايلاۋالدى باعدارلاماسىندا دا ءبىراز ماسەلە كوتەرىلدى", - دەپ اتاپ ءوتتى نوروۆ.
