بۇگىن قر پارلامەنتى ءماجىلىسى جالپى وتىرىسىندا بىرقاتار ماڭىزدى ماسەلەلەرمەن قاتار «قازاقستان رەسپۋبليكاسىنىڭ ۇكىمەتى مەن فرانتسۋز رەسپۋبليكاسىنىڭ ۇكىمەتى اراسىنداعى جاھاندىق جىلىنۋعا قارسى كۇرەس سالاسىنداعى ىنتىماقتاستىقتى ىسكە اسىرۋ تۋرالى ارنايى كەلىسىمدى راتيفيكاتسيالاۋ تۋرالى» قازاقستان رەسپۋبليكاسى زاڭىنىڭ جوباسى قارالدى. بۇل تۋرالى قازاقستان رەسپۋبليكاسىنىڭ ەنەرگەتيكا ءمينيسترى الماسادام مايدانۇلى ساتقاليەۆ بايانداما جاسادى.
وسى زاڭ جوباسىنا بايلانىستى ەكى ەلدىڭ اراسىنداعى كەلىسىم-شارت تۋرالى قر پارلامەنتى ءماجىلىسى دەپۋتاتى قازىبەك يسا وتكىر سۇراق قويدى:
-مەن ەڭ الدىمەن ەنەرگەتيكا ءمينيسترى الماسادام مايدانۇلىنا بايانداماسىن قازاقشا، ياعني مەملەكەتتىك تىلدە جاساعانى ءۇشىن راحمەت ايتامىن. جاڭا مۇنىڭ الدىندا ونەركاسىپ جانە قۇرىلىس ءمينيسترى قانات شارلاپاەۆ تا شاماسى كەلگەنشە قازاقشا بايانداما جاساپ، قازاق تىلىندە جاۋاپ بەرۋگە تىرىستى.
وسىلاي ءبىزدىڭ مينيسترلەر بىرتە-بىرتە ءوز مەملەكەتىنىڭ ءتىلىن ۇيرەنىپ الادى دەپ ۇمىتتەنىپ وتىرمىز. قازاق ءمينيسترى قازاقشا سويلەسە قۋاناتىن جاعدايعا جەتتىك وتىز جىلدا!؟.
مەنىڭ سۇراعىم، قازاقستان مەن فرانتسيا اراسىنداعى كەلىسىم-شارت بىلتىر 2022 جىلى 30 قاراشادا فرانتسيا استاناسى پاريجدە جاسالىپتى.
كەلىسىم جاساپ وتىرعان ەكى مەملەكەت قازاقستان مەن فرانتسيا! ال كەلىسىم شارت نەگە ءۇش مەملەكەتتىڭ تىلىندە قازاق، فرانتسۋز جانە ورىس تىلىندە جاسالعان؟
كەلىسىم جاساپ وتىرعان ەكى مەملەكەت قوي - قازاقستان مەن فرانتسيا! بۇل جەرگە ءۇشىنشى مەملەكەت رەسەيدىڭ ءتىلىنىڭ نە قاجەتى بار!؟.
فرانتسياعا رەسەي ءتىلىنىڭ تۇككە قاجەتى جوق! سوندا ورىس تىلىندەگى كەلىسىم-شارت ءبىزدىڭ، قازاقستاننىڭ ءوزىنىڭ مەملەكەتتىك ءتىلىن بىلمەيتىن ۇكىمەت ءۇشىن جاسالعان با؟!. قاشانعا دەيىن كەلىسىم-شارتتاردى ورىس تىلىندە عانا ءتۇسىنىپ جۇرمەكشىسىزدەر؟
كەشە دە سينگاپۋرمەن كەلىسىم-شارتتا دا ورىس ءتىلى ءجۇر.
تاۋەلسىزدىك العانىمىزعا 32 جىل بولدى عوي، ورىس ءتىلىن قوسۋ قاشانعى جالعاسادى، توقتاتاتىن ۋاقىت جەتكەن جوق پا؟
