ءماجىلىس دەپۋتاتى جۇلدىز سۇلەيمەنوۆا الماتىدا وتكەن XV «Media قۇرىلتاي 2023» سالالىق كونفەرەنتسياسىندا زاڭنامادان «ءباسپاسوز كارتاسىن» الىپ تاستاۋ ۇسىنىلعانىن ايتتى، دەپ حابارلايدى «ادىرنا» ءتىلشىسى.
«ۇكىمەتتەن كەلگەن نورمادا جۋرناليستەردى اككرەديتتەۋ، جەڭىلدەتىلگەن اككرەديتتەۋ جانە ءباسپاسوز كارتاسى اتتى ءۇش ۇعىم بەرىلدى. ءبىز نەگىزگى تولىققاندى ءبىر ۇعىم، ياعني، اككرەديتتەۋدى قالدىرۋدى سۇرايمىز. سەبەبى ول ورتاق رەتتەلگەن تارتىپكە نەگىزدەلۋى قاجەت. ەگەر ونىڭ جەڭىلدەتىلگەن، ونلاين نەمەسە باسقا دا تۇرلەرى بولسا، ازاماتتار اراسىندا تۇسىنىسپەۋشىلىك، جۋرناليستەر اراسىندا تەڭدىك ماسەلەسىنە قاتىستى سۇراقتار تۋىندايدى. «AMANAT» پارتياسى فراكتسياسى دەپۋتاتتارى ءباسپاسوز كارتاسى تۋرالى نورمانى قولدامايدى جانە ول نورمانى الىپ تاستاۋعا بايلانىستى تۇزەتۋ ەنگىزىلدى»، – دەدى سۇلەيمەنوۆا.
دەپۋتاتتىڭ ايتۋىنشا، ءباسپاسوز كارتاسى ءجۋرناليستىڭ اككرەديتتەۋ راسىمىنەن وتكەنىن راستايتىن قۇجات بولىپ سانالادى. بۇل باپتى «قۇقىقتىق اكتىلەر تۋرالى» قازاقستان رەسپۋبليكاسى زاڭى تالاپتارىنا سايكەس كەلمەيتىندىكتەن جانە جۋرناليستەردى اككرەديتتەۋ ءراسىمىنىڭ قولدانىستاعى تالابىنا قايشى بولعاندىقتان تولىعىمەن الىپ تاستاۋ ۇسىنىلادى.
