ەلوردادا «AMANAT» پارتياسىنىڭ قولداۋىمەن قازاقستان مۇگەدەكتەر كونفەدەراتسياسى ۇيىمداستىرعان XVI «جان شۋاق» قوعامدىق سىيلىعىنىڭ لاۋرەاتتارىن ماراپاتتاۋ ءراسىمى ءوتتى.
بەيبىتشىلىك جانە كەلىسىم سارايىندا مىڭنان استام مەيمان مەن قاتىسۋشىلار جينالدى. ءىس-شارا باستالار الدىندا بەينەلەۋ جانە قولدانبالى ونەر كورمەسى ءوتىپ، وندا ەرەكشە قاجەتتىلىگى بار سۋرەتشىلەر ازىرلەگەن ونەر تۋىندىلارى ۇسىنىلدى.
ءسوز باسىندا ءماجىلىس سپيكەرى، «AMANAT» پارتياسىنىڭ توراعاسى ەرلان قوشانوۆ پرەزيدەنت ەرەكشە قاجەتتىلىگى بار ادامداردى قولداۋ ماسەلەسىنە ايرىقشا نازار اۋداراتىنىن اتاپ ءوتتى.
«ءبىز قازىر ينكليۋزيۆتى مەملەكەت، ينكليۋزيۆتى ەكونوميكا، ينكليۋزيۆتى قوعام تۋرالى ءجيى ايتامىز. كەڭ ماعىناسىندا «ينكليۋزيۆ» ۇعىمى ادىلدىك پەن بىرلىك، ءتارتىپ پەن زاڭ ۇستەمدىگى جانە تەڭ مۇمكىندىكتەر دەگەندى بىلدىرەدى. بۇل – مەملەكەت باسشىسى قاسىم-جومارت توقاەۆ قولعا العان رەفورمالاردىڭ نەگىزگى باسىمدىقتارى»، – دەدى ەرلان قوشانوۆ.
سونداي-اق، ءماجىلىس توراعاسى پرەزيدەنت تاپسىرماسى بويىنشا ەلىمىزدە حالىقتىڭ الەۋمەتتىك جاعىنان وسال ساناتتارىنىڭ قۇقىقتارى جونىندەگى ومبۋدسمەن ينستيتۋتى جۇمىس ىستەپ جاتقانىن ەرەكشە اتاپ ءوتتى.
«ينكليۋزيۆتى پارلامەنت» دەپۋتاتتىق توبى قىزمەتكە كىرىستى. ونىڭ قۇرامىندا 19 دەپۋتات بار. وڭىرلىك ءماسليحاتتاردا ەرەكشە قاجەتتىلىگى بار 71 دەپۋتات ءوز مىندەتىن اتقارۋدا. ولار الەۋمەتتىك كەدەرگىلەردى جويۋ جانە ەرەكشە قاجەتتىلىگى بار ادامدارعا قولجەتىمدى ورتا قۇرۋ ماسەلەسىمەن تۇراقتى تۇردە اينالىسىپ كەلەدى.
قازاقستان مۇگەدەكتەر كونفەدەراتسياسىنىڭ پرەزيدەنتى جانات وماربەكوۆانىڭ ايتۋىنشا، بيىل «جان شۋاق» سىيلىعىنا ەلىمىزدىڭ بارلىق وڭىرىنەن 200-دەن استام ءوتىنىم كەلىپ ءتۇستى. جالپى، وسى ۋاقىت ارالىعىندا بارلىعى 80-گە جۋىق ادام ماراپاتقا بولەندى.
«وزىندىك ەرەكشەلىگىنە قاراماستان، ءار ادام تەڭ مۇمكىندىك پەن قۇقىققا يە بولۋى كەرەك. بۇل سىيلىق اتالعان قاعيدانى ءومىر شىندىعىنا اينالدىرعان، قيىندىققا مويىماي، تاباندىلىق تانىتقان جانە بارىمىزگە شالقار شابىت سىيلاعان جانداردى دارالايدى. ءبىز ەرەكشە قاجەتتىلىگى بار ادامداردىڭ دامۋىنا، ءوز قابىلەت-قارىمىن تانىتۋىنا جانە جاڭا مۇمكىندىكتەرگە جول اشۋىنا كومەكتەسەمىز»، – دەدى ول.
«سپورت سالاسىنداعى ۇزدىك جەتىستىكتەرى ءۇشىن» سىيلىعىن قولارباداعى بيىمەن ازيا جانە الەم چەمپيونى اتانعان شىمكەنتتىك ەرمەك قالىمبەتوۆ يەلەندى.
«كاسىپكەرلىك قىزمەتتى دامىتۋعا قوسقان ۇلەسى ءۇشىن» نوميناتسياسى بويىنشا مۇگەدەكتەر ارباسىن تەگىن جوندەيتىن «Invakolyaski.kz» شەبەرحاناسىن اشقان الماتىلىق داۋرەن الكانوۆ ماراپاتتالدى.
استانالىق ۆالەنتينا تولماچەۆا «مۇگەدەكتىگى بار ادامدارعا قاتىستى قوعامدىق سانانىڭ وڭ وزگەرۋىنە قوسقان ۇلەسى ءۇشىن» ماراپاتىنا يە بولدى. ول ەرەكشە قاجەتتىلىگى بار ادامدارعا ارنالعان ءتۇرلى ءىس-شارالار مەن كونكۋرستار ۇيىمداستىرادى.
«مۇگەدەكتىگى بار ادامداردىڭ عىلىم مەن ءبىلىم بەرۋ قىزمەتىن دامىتۋعا قوسقان ۇلەسى جانە وقۋعا تالپىنىسى ءۇشىن» نوميناتسياسى بويىنشا تۇركىستان وبلىسىنىڭ ازاماتى مەيىرحان توپانباي سىيلىققا لايىق دەپ تانىلدى. ول – 10 ءتىلدى مەڭگەرىپ، 68 مىڭ كىتاپ وقىعان ادام.
تەمىرتاۋلىق ارمان قارىنساۋ «مادەنيەت سالاسىنداعى ۇزدىك جەتىستىكتەرى ءۇشىن» نوميناتسياسى بويىنشا سىيلىق يەلەندى. ول بۇگىندە «قاناتتىلار» ينكليۋزيۆتى تەاترىنىڭ ءارتىسى.
ەلوردا تۇرعىنى يلنار ايتنياكوۆ «كۇش-جىگەرى جانە جەڭىسكە تالپىنىسى ءۇشىن» نوميناتسياسىنىڭ يەگەرى اتاندى. ول كومپيۋتەر جوندەۋ شەبەرحاناسىن اشىپ، قايىرىمدىلىقپەن اينالىسىپ كەلەدى.
«ونەر سالاسىنداعى اسا ۇزدىك جەتىستىكتەرى ءۇشىن» ماراپاتىنا تارازدان كەلگەن انار بەكسۇلتانوۆا لايىق دەپ تانىلدى. ول تىگىن شەبەرحاناسىن اشىپ، مۇگەدەك ايەلدەردى وقىتىپ، جۇمىسقا ورنالاستىرىپ جاتىر.
ال «ينكليۋزيۆتى پارلامەنت» دەپۋتاتتىق توبىنىڭ ارنايى نوميناتسياسىندا استانالىق سەرىك ءجۇزباي جەڭىسكە جەتتى. جانى جومارت ازامات قايىرىمدىلىقپەن اينالىسىپ، قاراۋسىز قالعان 100-دەن استام بالانى تۋعان-تۋىستارىمەن تابىستىرىپ ءجۇر. زاعيپ نەمەسە كوزى ناشار كورەتىن وتانداستارىمىزدى قازاق، ورىس، اراب تىلدەرىنە برايل جۇيەسى بويىنشا وقىتۋ جۇمىسىن ۇيىمداستىردى.
جەڭىمپازداردىڭ ارقايسىسى 1 ملن تەڭگە كولەمىندەگى اقشالاي سىيلىققا يە بولدى.
ءىس-شارا قازاقستاندىق ەسترادا جۇلدىزدارى ونەر كورسەتكەن مەرەكەلىك كونتسەرتپەن اياقتالدى.
