Elordada «AMANAT» partııasynyń qoldaýymen Qazaqstan múgedekter konfederaııasy uıymdastyrǵan XVI «Jan Shýaq» qoǵamdyq syılyǵynyń laýreattaryn marapattaý rásimi ótti.
Beıbitshilik jáne kelisim saraıynda myńnan astam meıman men qatysýshylar jınaldy. Is-shara bastalar aldynda beıneleý jáne qoldanbaly óner kórmesi ótip, onda erekshe qajettiligi bar sýretshiler ázirlegen óner týyndylary usynyldy.
Sóz basynda Májilis Spıkeri, «AMANAT» partııasynyń Tóraǵasy Erlan Qoshanov Prezıdent erekshe qajettiligi bar adamdardy qoldaý máselesine aıryqsha nazar aýdaratynyn atap ótti.
«Biz qazir ınklıýzıvti memleket, ınklıýzıvti ekonomıka, ınklıýzıvti qoǵam týraly jıi aıtamyz. Keń maǵynasynda «ınklıýzıv» uǵymy ádildik pen birlik, tártip pen zań ústemdigi jáne teń múmkindikter degendi bildiredi. Bul – Memleket basshysy Qasym-Jomart Toqaev qolǵa alǵan reformalardyń negizgi basymdyqtary», – dedi Erlan Qoshanov.
Sondaı-aq, Májilis Tóraǵasy Prezıdent tapsyrmasy boıynsha elimizde halyqtyń áleýmettik jaǵynan osal sanattarynyń quqyqtary jónindegi Ombýdsmen ınstıtýty jumys istep jatqanyn erekshe atap ótti.
«Inklıýzıvti Parlament» depýtattyq toby qyzmetke kiristi. Onyń quramynda 19 depýtat bar. Óńirlik máslıhattarda erekshe qajettiligi bar 71 depýtat óz mindetin atqarýda. Olar áleýmettik kedergilerdi joıý jáne erekshe qajettiligi bar adamdarǵa qoljetimdi orta qurý máselesimen turaqty túrde aınalysyp keledi.
Qazaqstan múgedekter konfederaııasynyń prezıdenti Janat Omarbekovanyń aıtýynsha, bıyl «Jan Shýaq» syılyǵyna elimizdiń barlyq óńirinen 200-den astam ótinim kelip tústi. Jalpy, osy ýaqyt aralyǵynda barlyǵy 80-ge jýyq adam marapatqa bólendi.
«Ózindik ereksheligine qaramastan, ár adam teń múmkindik pen quqyqqa ıe bolýy kerek. Bul syılyq atalǵan qaǵıdany ómir shyndyǵyna aınaldyrǵan, qıyndyqqa moıymaı, tabandylyq tanytqan jáne bárimizge shalqar shabyt syılaǵan jandardy daralaıdy. Biz erekshe qajettiligi bar adamdardyń damýyna, óz qabilet-qarymyn tanytýyna jáne jańa múmkindikterge jol ashýyna kómektesemiz», – dedi ol.
«Sport salasyndaǵy úzdik jetistikteri úshin» syılyǵyn qolarbadaǵy bıimen Azııa jáne álem chempıony atanǵan shymkenttik Ermek Qalymbetov ıelendi.
«Kásipkerlik qyzmetti damytýǵa qosqan úlesi úshin» nomınaııasy boıynsha múgedekter arbasyn tegin jóndeıtin «Invakolyaski.kz» sheberhanasyn ashqan almatylyq Dáýren Alkanov marapattaldy.
Astanalyq Valentına Tolmacheva «Múgedektigi bar adamdarǵa qatysty qoǵamdyq sananyń oń ózgerýine qosqan úlesi úshin» marapatyna ıe boldy. Ol erekshe qajettiligi bar adamdarǵa arnalǵan túrli is-sharalar men konkýrstar uıymdastyrady.
«Múgedektigi bar adamdardyń ǵylym men bilim berý qyzmetin damytýǵa qosqan úlesi jáne oqýǵa talpynysy úshin» nomınaııasy boıynsha Túrkistan oblysynyń azamaty Meıirhan Topanbaı syılyqqa laıyq dep tanyldy. Ol – 10 tildi meńgerip, 68 myń kitap oqyǵan adam.
Temirtaýlyq Arman Qarynsaý «Mádenıet salasyndaǵy úzdik jetistikteri úshin» nomınaııasy boıynsha syılyq ıelendi. Ol búginde «Qanattylar» ınklıýzıvti teatrynyń ártisi.
Elorda turǵyny Ilnar Aıtnıakov «Kúsh-jigeri jáne jeńiske talpynysy úshin» nomınaııasynyń ıegeri atandy. Ol kompıýter jóndeý sheberhanasyn ashyp, qaıyrymdylyqpen aınalysyp keledi.
«Óner salasyndaǵy asa úzdik jetistikteri úshin» marapatyna Tarazdan kelgen Anar Beksultanova laıyq dep tanyldy. Ol tigin sheberhanasyn ashyp, múgedek áıelderdi oqytyp, jumysqa ornalastyryp jatyr.
Al «Inklıýzıvti Parlament» depýtattyq tobynyń arnaıy nomınaııasynda astanalyq Serik Júzbaı jeńiske jetti. Jany jomart azamat qaıyrymdylyqpen aınalysyp, qaraýsyz qalǵan 100-den astam balany týǵan-týystarymen tabystyryp júr. Zaǵıp nemese kózi nashar kóretin otandastarymyzdy qazaq, orys, arab tilderine Braıl júıesi boıynsha oqytý jumysyn uıymdastyrdy.
Jeńimpazdardyń árqaısysy 1 mln teńge kólemindegi aqshalaı syılyqqa ıe boldy.
Is-shara qazaqstandyq estrada juldyzdary óner kórsetken merekelik konertpen aıaqtaldy.
