تۇركىستان وبلىسىندا ءبىلىم بەرۋ قىزمەتكەرلەرى 2 ملرد تەڭگەنى جىمقىردى دەپ كۇدىكتەلىپ وتىر. بۇل تۋرالى انتيكوردىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
تۇركىستان وبلىسى بويىنشا سىبايلاس جەمقورلىققا قارسى قىزمەت شاردارا جانە سارىاعاش اۋداندارىنىڭ ءبىلىم بولىمدەرىنىڭ بۋحگالتەرلەرىنە قاتىستى سوتقا دەيىنگى تەرگەۋ جۇرگىزۋدە.
«اتالعان تۇلعالار بيۋدجەت قاراجاتىن اسا ءىرى كولەمدە جۇيەلى نەگىزدە جىمقىردى دەپ كۇدىكتەلۋدە. تەرگەۋ مالىمەتتەرى بويىنشا، كۇدىكتىلەر 2020-2023 جىلدار ارالىعىندا ءبىلىم بەرۋ سالاسىندا جۇمىس ىستەمەيتىن تۇلعالاردىڭ شوتتارىنا اقشا قاراجاتىن اۋدارۋ، سونداي-اق مەكتەپ قىزمەتكەرلەرىنە جوعارى جالاقى ەسەپتەۋ ارقىلى شامامەن 2,6 ملرد تەڭگە سوما جىمقىرعان»،—دەلىنگەن حابارلامادا.
انتيكوردىڭ مالىمەتىنشە، قازىرگى ۋاقىتتا تۇركىستان وبلىسىنىڭ ءبىلىم بەرۋ سالاسىنان 17 ادام قىلمىستىق جاۋاپكەرشىلىككە تارتىلۋدا، ولاردىڭ 4-ءى قاماۋعا الىندى.
زالالدى وتەۋ ماقساتىندا 39 جىلجىمايتىن مۇلىك، 44 اۆتوماشينا، زەرگەرلىك بۇيىمدار جانە قىلمىستىق ىستەر بويىنشا ايىپتالۋشىلاردىڭ اقشالاي قاراجاتتارى بۇعاتتالدى.
قىلمىستىق-پروتسەستىك كودەكسىنىڭ 201-بابىنا سايكەس وزگە اقپارات جاريا ەتۋگە جاتپايدى.
