الماتىدا بانك قىزمەتكەرلەرى الاياققا الدانىپ قالعان، دەپ حابارلايدى "ادىرنا" ءتىلشىسى Polisia.kz-كە سىلتەپ.
الاياقتار ادامداردى الداۋ ارقىلى مۇمكىندىگىنشە كوپ اقشا تابۋدى كوزدەگەن. الدانعانداردىڭ اراسىندا ەكىنشى دەڭگەيلى بانكتەردىڭ ءبىرىنىڭ قىزمەتكەرى دە بار بولىپ شىقتى.
"ونىڭ مەسسەندجەرىنە قۇقىق قورعاۋ ورگاندارىنىڭ وكىلدەرى بانك پەن ونىڭ قىزمەتكەرلەرىنە قاتىستى تەكسەرۋ جۇرگىزىپ جاتقانىن جانە ول ولاردىڭ ناقتى نۇسقاۋلارىن ورىنداۋى كەرەك دەگەن حابارلامالار كەلە باستاعان. كەيىنىرەك ولار كيبەرشابۋىل بولعانىن جانە الاياقتىق ارەكەتتەردىڭ الدىن الۋ ءۇشىن بارلىق قولدانىستاعى شوتتان اقشانى الىپ، سودان كەيىن سەنىمدى ادامدارعا اۋدارۋ قاجەتتىگىن حابارلاعان. وسى نۇسقاۋلاردى ورىنداعان ايەل شوتىنان 4 ميلليون تەڭگە مەن 10 مىڭ دوللاردى شەشىپ العان. ول اقشانى كۋرەرگە بەرىپ جىبەرگەن", – دەدى الماتى قالالىق پوليتسيا دەپارتامەنتى باستىعىنىڭ ورىنباسارى قۋاتبەك ناۋاتوۆ.
ارتىنشا اقشانى الىپ كەتكەن كۋرەر ۇستالعان. ول بانكتەن العان سوممانى شوتتارعا اۋدارىپ جىبەرگەن. پوليتسيا ولاردىڭ ءىزى شەتەلدە تابىلعانىن ايتتى.
