اقتوبەلىك تۇرعىن سوتتا كىناسىز ەكەنىن دالەلدەپ، 20 ملن تەڭگە ءوندىرىپ الدى

3687
Adyrna.kz Telegram

اقتوبەلىك ارداق تەمىرحانوۆ ءوزىنىڭ كىناسىز ەكەنىن دالەلدەپ، قر قارجى مينيسترلىگىنەن 20 ملن تەڭگە مورالدىق شىعىندى ءوندىرىپ الدى، دەپ حابارلايدى “ادىرنا” ۇلتتىق پورتالى قازاقپاراتقا سىلتەمە جاساپ. 

ارداق تەمىرحانوۆ قر قارجى مينيسترلىگىن سوتقا بەرىپ، مورالدىق شىعىن رەتىندە 90 ميلليون تەڭگە سۇرادى. سونىمەن بىرگە زاڭگەرلىك كومەك العانى ءۇشىن، ياعني قورعاۋشى قىزمەتىنە 3,5 ملن، مەديتسينالىق قىزمەتتەرىنە 135 509, قىلمىستىق ىسكە قاجەتتى ساراپتاماعا 126 300, 2018-2020 جىلدار ارالىعىنداعى تابىسىنان ايىرىلعانى ءۇشىن 4 440 000 تەڭگە تالاپ ەتتى.

ءىس ماتەريالىنا سۇيەنسەك، وبلىستىق پوليتسيا دەپارتامەنتى 2017 جىلدىڭ 6 قاراشاسى كۇنى ارداق تەمىرحانوۆتى قىلمىستىق كودەكستىڭ 189-ى بابى بويىنشا ۇستاپ، سوت ونى 2018 جىلدىڭ 6 قاراشاسىندا 7 جىلعا باس بوستاندىعىنان ايىردى. ءارى «كازۆتورچەرمەت» اق-نا 16 775 067 تەڭگە، مەملەكەتتىك باجعا 503 250 تەڭگە تولەۋ مىندەتتەلىپ، سوت زالىندا قاماۋعا الىندى.

اقتوبە وبلىستىق سوتى اپەللياتسيا كەزىندە №2 اقتوبە قالالىق سوتىنىڭ شەشىمىن وزگەرىسسىز قالدىرعانىمەن، جوعارعى سوت 2020 جىلى سوت شەشىمىن نەگىزسىز دەپ تانىپ، قايتا تەرگەۋگە جىبەردى.

ال 2020 جىلدىڭ 29 جەلتوقسانى كۇنى اقتوبە وبلىستىق سوتىنىڭ قىلمىستى ىستەر جونىندەگى سوت القاسى ارداق تەمىرحانوۆتى كىناسىز دەپ تانىپ، سوت زالىنان بوستاندىققا شىعاردى. كەيىن ول جازىقسىز سوتتالعانى ءۇشىن قر قارجى مينيسترلىگىنەن مورالدىق جانە ماتەريالدىق شىعىندى وتەمەككە سوتقا ارىز جازدى.

«ارداق تەمىرحانوۆتىڭ قر قارجى مينيسترلىگىنەن ماتەريالدىق جانە مورالدىق شىعىندى ءوندىرۋ تۋرالى ءوتىنىشى ءىشىنارا قاناعاتتاندىرىلدى. رەسپۋبليكالىق بيۋدجەتتەن مورالدىق شىعىن رەتىندە 20 ملن تەڭگە، زاڭگەر قىزمەتى ءۇشىن 3,5 ملن تەڭگە، مەديتسينالىق تەكسەرۋگە 103 409 تەڭگە، قىلمىستىق ىسكە قاجەتتى ساراپتاماعا 126 300 تەڭگە، تابىسىنان ايىرعان كەزدەگى شىعىنى ءۇشىن 4 440 000 تەڭگە جانە ازاماتتىق ءىس كەزىندە شىعىنى رەتىندە 800 مىڭ تەڭگە ءوندىرىلسىن. ارداق تەمىرحانوۆتىڭ قر قارجى مينيسترلىگىنەن 70 ملن تەڭگە مورالدىق جانە 32 100 تگ مەديتسينالىق تەكسەرۋ شىعىنىن ءوندىرۋ تۋرالى ارىزى قاناعاتتاندىرۋسىز قالدىرىلسىن»،- دەپ جازىلعان سوت شەشىمىندە. ايتا كەتەيىك، سوت شەشىمى زاڭدى كۇنىنە ەنگەن جوق. تاراپتار ءبىر ايدىڭ ىشىندە ارىز تۇسىرە الادى.

پىكىرلەر