اقتوبە وبلىسى قارعالى اۋدانىنداعى پەتروپاۆلوۆكا اۋىلىندا 64 اعاشتى كەسۋگە بيۋدجەتتەن 1 696 428 تەڭگە قارجى ءبولىندى، - دەپ حابارلايدى ادىرنا ۇلتتىق پورتالى satypalu سايتىنا سىلتەمە جاساپ.
پەتروپاۆلوۆكا – اقتوبە وبلىسىنىڭ قارعالى اۋدانىنا قارايتىن شاعىن اۋىل. بۇگىنگى تاڭدا جەلتاۋ اۋىلدىق وكرۋگىنىڭ ورتالىعى سانالادى. ەلدىمەكەندەگى حالىق سانى ەكى مىڭ ادامعا جەتپەيدى.
16 قاراشا كۇنى قارعالى اۋدانىنىڭ «جەلتاۋ اۋىلدىق وكرۋگى اكىمىنىڭ اپپاراتى» مەملەكەتتىك مەكەمەسى «قارعالى اۋدانى پەتروپاۆل اۋىلىنداعى قاتتى داۋىل سالدارىنان سىنعان نەمەسە قۋراعان اعاشتاردى كەسۋ جانە شىعارۋ جۇمىستارى» دەگەن تاقىرىپپەن تەندەر جاريالاعان.مەملەكەتتىك ساتىپ الۋدى 27 قاراشا كۇنى «يپ ايدا» كومپانياسى جەڭىپ العان.
تەحنيكالىق سيپاتتامادا تاپسىرىستى ورىنداۋشى كومپانيا سىنعان، قۋراعان اعاشتاردى كەسۋ جانە ارنايى پوليگونعا شىعارۋ، جۇمىس كەزىندە ارنايى جابدىقپەن (اۆتوۆىشكا), قۇرال-سايمانمەن جابدىقتالعان ارنايى كولىكتى پايدالانۋ، اعاشتى كەسۋ كەزىندە ەلەكتر سىمدارىن ۇزبەي، قاۋىپسىزدىك ەرەجەلەرىن ساقتاۋ، زاقىمدالعان اعاش بۇتاقتارىن جويۋ، شىرىك اعاشتاردى دىڭگەگىنە دەيىن كەسۋ، بۇتاقتار مەن قوقىستاردى ارنايى بەكىتىلگەن پوليگونعا شىعارۋ (قاشىقتىعى 5 شاقىرىمعا دەيىن) كەرەكتىگى كورسەتىلگەن.
سونداي-اق جۇمىس كەزىندە قورشاۋلاردىڭ قيراۋى، ەلەكتر سىمدارىنىڭ ءۇزىلۋى، تەلەفون كوممۋنيكاتسيالارىنىڭ، عيمارات پەن اۆتوكولىكتىڭ زاقىمدانۋى، ت.ب جاعدايلار ورىن السا، بارىنە تاپسىرىس ورىنداۋشى تولىق جاۋاپتى بولاتىنى ايتىلعان.
تەحنيكالىق سيپاتتامادا اعاشتى كەسۋ جانە تاسىمالداۋ باعاسى – 30 000 تەڭگە (64 دانا اعاش) دەپ بەلگىلەنىپتى. سوندا اقتوبە وبلىسى قارعالى اۋدانىنداعى پەتروپاۆلوۆكا اۋىلىنىڭ اكىمدىگى بار بولعانى 64 دانا اعاشتى كەسۋ ءۇشىن بيۋدجەتتەن 1 696 428 تەڭگە قارجى جۇمساماق پا؟ جوق، الدە 1 696 428 تەڭگەنىڭ ءار وتىز مىڭ تەڭگەسىنە 64 دانا اعاشتان كەسكىزبەك پە؟
ولاي دەيىن دەسەك، حالقىنىڭ سانى ەكى مىڭعا جەتپەيتىن شاعىن اۋىلدان 3 584 دانا تەرەكتىڭ كەسىپ تاستاۋ كەرەك بولادى. بۇل دەگەنىڭىز جاسىل جەلەكتى ورماندى وتاپ تاستاعانمەن بىردەي دۇنيە...
قارعالىلىقتاردىڭ 1 696 428 تەڭگەگە قانشا اعاشتى وتاعالى وتىرعانىن سۇراپ ءتيىستى مەكەمەلەرگە حات جولدادىق. جاۋابى كەلە سالا، ونى دا جاريالايتىن بولامىز.
قانات بىرلىكۇلى
ادىرنا ۇلتتىق پورتالى
