Aqtóbe oblysy Qarǵaly aýdanyndaǵy Petropavlovka aýylynda 64 aǵashty kesýge bıýdjetten 1 696 428 teńge qarjy bólindi, - dep habarlaıdy Adyrna ulttyq portaly satypalu saıtyna silteme jasap.
Petropavlovka – Aqtóbe oblysynyń Qarǵaly aýdanyna qaraıtyn shaǵyn aýyl. Búgingi tańda Jeltaý aýyldyq okrýginiń ortalyǵy sanalady. Eldimekendegi halyq sany eki myń adamǵa jetpeıdi.
16 qarasha kúni Qarǵaly aýdanynyń «Jeltaý aýyldyq okrýgi ákiminiń apparaty» memlekettik mekemesi «Qarǵaly aýdany Petropavl aýylyndaǵy qatty daýyl saldarynan synǵan nemese qýraǵan aǵashtardy kesý jáne shyǵarý jumystary» degen taqyryppen tender jarııalaǵan.Memlekettik satyp alýdy 27 qarasha kúni «IP Aıda» kompanııasy jeńip alǵan.
Tehnıkalyq sıpattamada tapsyrysty oryndaýshy kompanııa synǵan, qýraǵan aǵashtardy kesý jáne arnaıy polıgonǵa shyǵarý, jumys kezinde arnaıy jabdyqpen (avtovyshka), qural-saımanmen jabdyqtalǵan arnaıy kólikti paıdalaný, aǵashty kesý kezinde elektr symdaryn úzbeı, qaýipsizdik erejelerin saqtaý, zaqymdalǵan aǵash butaqtaryn joıý, shirik aǵashtardy dińgegine deıin kesý, butaqtar men qoqystardy arnaıy bekitilgen polıgonǵa shyǵarý (qashyqtyǵy 5 shaqyrymǵa deıin) kerektigi kórsetilgen.
Sondaı-aq jumys kezinde qorshaýlardyń qıraýy, elektr symdarynyń úzilýi, telefon kommýnıkaııalarynyń, ǵımarat pen avtokóliktiń zaqymdanýy, t.b jaǵdaılar oryn alsa, bárine tapsyrys oryndaýshy tolyq jaýapty bolatyny aıtylǵan.
Tehnıkalyq sıpattamada aǵashty kesý jáne tasymaldaý baǵasy – 30 000 teńge (64 dana aǵash) dep belgilenipti. Sonda Aqtóbe oblysy Qarǵaly aýdanyndaǵy Petropavlovka aýylynyń ákimdigi bar bolǵany 64 dana aǵashty kesý úshin bıýdjetten 1 696 428 teńge qarjy jumsamaq pa? Joq, álde 1 696 428 teńgeniń ár otyz myń teńgesine 64 dana aǵashtan keskizbek pe?
Olaı deıin desek, halqynyń sany eki myńǵa jetpeıtin shaǵyn aýyldan 3 584 dana terektiń kesip tastaý kerek bolady. Bul degenińiz jasyl jelekti ormandy otap tastaǵanmen birdeı dúnıe...
Qarǵalylyqtardyń 1 696 428 teńgege qansha aǵashty otaǵaly otyrǵanyn surap tıisti mekemelerge hat joldadyq. Jaýaby kele sala, ony da jarııalaıtyn bolamyz.
Qanat Birlikuly
Adyrna ulttyq portaly
