بۇگىن، 1 جەلتوقساندا پاۆلودار وبلىسى پوليتسيا دەپارتامەنتىنىڭ ەكس-باسشىسى نۇرلان ءماسىموۆتىڭ ىسىنە قاتىستى اپەللياتسيالىق شاعىم قارالدى، دەپ حابارلايدى «ادىرنا» ءتىلشىسى.
«ءىس بويىنشا ۇكىمنىڭ كۇشىن جويۋعا اكەلىپ سوقتىراتىن قىلمىستىق پروتسەستىك زاڭىنىڭ ەلەۋلى بۇزۋشىلىقتارى انىقتالعان جوق. وسىعان بايلانىستى م. جانە س-عا قاتىستى ۇكىم وزگەرىسسىز، ال اپەللياتسيالىق شاعىمدار قاناعاتتاندىرۋسىز قالدىرىلسىن»،—دەدى سۋديا مارات رىمباەۆ.
بۇل ءىس بويىنشا تاعى ءبىر ايىپتالۋشى - كاسىپكەر ەۆگەني لەۆكوۆيچتىڭ اپەللياتسيالىق شاعىمىن سوت ءىشىنارا قاناعاتتاندىردى. سوت القاسىنىڭ شەشىمى بويىنشا وعان جەتى جىلدان بەس جىلعا دەيىن باس بوستاندىعىنان ايىرۋ مەرزىمى قىسقارتىلدى. سونداي-اق شوتتارى بۇعاتتان بوساتىلدى.
ايتا كەتەيىك، بۇعان دەيىن نۇرلان ءماسىموۆ "پارا الۋ", "سەنىپ تاپسىرىلعان بوتەن مۇلىكتى يەمدەنىپ الۋ نەمەسە تالان-تاراجعا سالۋ", "شەكارانى زاڭسىز بۇزىپ ءوتۋ" باپتارى بويىنشا كىنالى دەپ تانىلعان ەدى. سۋديا نۇرلان قايىربەكوۆ ءماسىموۆتى 10 جىلعا سوتتاپ، مۇلكىن تاركىلەۋ تۋرالى ۇكىم شىعاردى. الايدا ايىپتالۋشى وزىنە تاعىلعان ايىپتاردى مويىنداماي،
ۇكىمگە اپپەلياتسيالىق شاعىم ءتۇسىردى.
