اقتاۋدا كومپانيا ديرەكتورى 400 ميلليون تەڭگە جىمقىردى دەگەن كۇدىكپەن ۇستالدى

اقتاۋداعى «باگيس» قۇرىلىس كومپانياسىنىڭ ديرەكتورى 120-عا جۋىق ۇلەسكەردىڭ 400 ميلليون تەڭگەسىن جىمقىردى دەپ ايىپتالۋدا، دەپ حابارلايدى «ادىرنا» ۇلتتىق پورتالى قارجى مونيتورينگى اگەنتتىگىنىڭ ءباسپاسوز قىزمەتىنە سىلتەمە جاساپ.

«اقتاۋ قالاسىنداعى قۇرىلىسى اياقتالماعان «اتامەكەن» تۇرعىن ءۇي كەشەنىندەگى ينۆەستورلاردىڭ سەنىپ تاپسىرىلعان قاراجاتىن ىسىراپ ەتۋ جانە جىمقىرۋ فاكتىسى بويىنشا «باگيس» جشس باسشىلىعىنا قاتىستى قىلمىستىق ءىس بويىنشا تەرگەۋ جالعاسۋدا. تەرگەۋ بارىسىندا جشس ديرەكتورىنىڭ 2017 جىلدىڭ ناۋرىزىنان 2022 جىلدىڭ قىركۇيەگىنە دەيىنگى ارالىقتا تۇرعىن ءۇي كەشەنىنىڭ قۇرىلىسىن اياقتايمىز دەگەن جەلەۋمەن 119 ۇلەسكەردىڭ ءىرى سومادا 400 ميلليون تەڭگەگە جۋىق قارجىسىن جىمقىرعانى انىقتالدى»، - دەلىنگەن حابارلامادا. قازىرگى ۋاقىتتا تەرگەۋ امالدارىمەن قاتار، قوسىمشا سوت ساراپتامالارى جۇرگىزىلۋدە، ونىڭ قورىتىندىسى بويىنشا كۇدىكتىنىڭ ارەكەتىنە تۇپكىلىكتى قۇقىقتىق باعا بەرىلەدى. باسقارما قازاقستان رەسپۋبليكاسى قىلمىستىق-پروتسەستىك كودەكسىنىڭ 201-بابىنا سايكەس وزگە مالىمەتتەردى جاريا ەتپەيدى. ەستەرىڭىزگە سالا كەتەيىك، 2020 جىلى اقتاۋدا وسى ىسكە قاتىستى 100-دەن استام وتباسى پاتەرلەرىن تالاپ ەتىپ، جانجال شىعارعان بولاتىن. حالىقتىڭ ايتۋىنشا، ولاردىڭ كوبى 100 پايىز الدىن الا تولەم جاساعانىمەن، ءۇش جىلدان بەرى  باسپانا جالداۋعا ءماجبۇر بولعان. ال «اتامەكەن» تۇرعىن ءۇي كەشەنى 2017 جىلى اياقتالادى دەپ ۋادە ەتىلگەن.

«ادىرنا» ۇلتتىق پورتالى