Aqtaýdaǵy «Bagıs» qurylys kompanııasynyń dırektory 120-ǵa jýyq úleskerdiń 400 mıllıon teńgesin jymqyrdy dep aıyptalýda, dep habarlaıdy «Adyrna» ulttyq portaly Qarjy monıtorıngi agenttiginiń baspasóz qyzmetine silteme jasap.
«Aqtaý qalasyndaǵy qurylysy aıaqtalmaǵan «Atameken» turǵyn úı keshenindegi ınvestorlardyń senip tapsyrylǵan qarajatyn ysyrap etý jáne jymqyrý faktisi boıynsha «Bagıs» JShS basshylyǵyna qatysty qylmystyq is boıynsha tergeý jalǵasýda. Tergeý barysynda JShS dırektorynyń 2017 jyldyń naýryzynan 2022 jyldyń qyrkúıegine deıingi aralyqta turǵyn úı kesheniniń qurylysyn aıaqtaımyz degen jeleýmen 119 úleskerdiń iri somada 400 mıllıon teńgege jýyq qarjysyn jymqyrǵany anyqtaldy», - delingen habarlamada.
Qazirgi ýaqytta tergeý amaldarymen qatar, qosymsha sot saraptamalary júrgizilýde, onyń qorytyndysy boıynsha kúdiktiniń áreketine túpkilikti quqyqtyq baǵa beriledi.
Basqarma Qazaqstan Respýblıkasy Qylmystyq-proestik kodeksiniń 201-babyna sáıkes ózge málimetterdi jarııa etpeıdi.
Esterińizge sala keteıik, 2020 jyly Aqtaýda osy iske qatysty 100-den astam otbasy páterlerin talap etip, janjal shyǵarǵan bolatyn. Halyqtyń aıtýynsha, olardyń kóbi 100 paıyz aldyn ala tólem jasaǵanymen, úsh jyldan beri baspana jaldaýǵa májbúr bolǵan. Al «Atameken» turǵyn úı kesheni 2017 jyly aıaqtalady dep ýáde etilgen.
«Adyrna» ulttyq portaly
