اتىراۋ مۇناي وڭدەۋ زاۋىتىنىڭ بۇرىنعى باس ديرەكتورى شۋحرات دانبايعا قاتىستى شىققان اقتاۋ ۇكىمى ءوز كۇشىن جويدى. بۇل تۋرالى جوعارعى سوتتىڭ قىلمىستىق ىستەر جونىندەگى سوت القاسى ايتتى، دەپ حابارلايدى «ادىرنا» ءتىلشىسى.
شەشىم 2023 جىلدىڭ 10 قازانىندا شىققان.
باس پروكۋرور ءوز شاعىمىندا بۇرىنعى ديرەكتورعا قاتىستى ءىس بارىسىندا قىلمىستىق ءىس جۇرگىزۋ زاڭدارىنىڭ دۇرىس قولدانىلماعانىن اتاپ ءوتتى. سونداي-اق ول سوت قورىتىندىلارى ءىستىڭ ناقتى ءمان-جايىنا ساي كەلمەيتىنىن مالىمدەدى. وسى جاعدايلارعا بايلانىستى سوت اكتىسىنىڭ كۇشى جويىلعان.
ەسكە سالايىق، شۋحرات دانباي مۇناي وڭدەۋ زاۋىتىن 2019 جىلدىڭ اقپانىنان 2021 جىلدىڭ شىلدەسىنە دەيىن باسقارعان ەدى. ول 2019-2020 جىلدارى «مۇنايدى تەرەڭ وڭدەۋ كەشەنىنىڭ» قۇرىلىسى كەزىندە مەردىگەردەن جەتكىزىلگەن اقاۋلى جابدىقتىڭ قۇنىن تالاپ ەتۋ بويىنشا شارالار قابىلدامادى جانە ولاردى اۋىستىرۋدى تالاپ ەتپەدى دەپ ايىپتالدى. سالدارىنان كاسىپورىنعا 2,9 ميلليارد تەڭگەدەن استام شىعىن كەلتىرىلگەن.
الايدا وسى جىلدىڭ مامىرىندا اتىراۋ قالالىق №2 سوتى شۋحرات دانبايعا قاتىستى ءىستى قايتا قاراپ، اقتاۋ ۇكىمىن شىعارعان بولاتىن.
