عىلىم جانە جوعارى ءبىلىم ءمينيسترى ساياسات نۇربەك «ءبىلىم تۋرالى» زاڭعا ەنگىزىلگەن وزگەرىستەر تۋرالى ايتتى. شەنەۋنىك شارت ورىندالماسا، ۋنيۆەرسيتەتتەر ليتسەنزياسىنان ايىرىلاتىنىن مالىمدەدى، دەپ حابارلايدى «ادىرنا» ۇلتتىق پورتالى.
ءمينيستردىڭ ايتۋىنشا، زاڭعا وزگەرىستەر اعىمداعى جىلدىڭ 1 قىركۇيەگىندە ەنگىزىلگەن. وسىعان سايكەس، ستۋدەنتتەردى جاتاقحانامەن قامتاماسىز ەتۋ بويىنشا بىلىكتىلىك تالاپتارى كۇشەيتىلدى.
«بيىلعى جىلدىڭ 1 قىركۇيەگىنەن باستاپ ءبىز «ءبىلىم تۋرالى» زاڭعا وزگەرىستەر ەنگىزدىك، ستۋدەنتتەردى تۇرعىن ۇيمەن قامتاماسىز ەتۋ، جاتاقحانامەن قامتاماسىز ەتۋ بويىنشا بىلىكتىلىك تالاپتارىن قاتايتتىق. بۇگىنگى تاڭدا مىندەتتى تالاپتار 70 پايىزدى قۇرايدى، ءبىز بۇل كورسەتكىشتى جۇزگە جەتكىزەمىز. بۇل ماڭىزدى شارت ورىندالماسا، ۋنيۆەرسيتەتتەر ليتسەنزياسىنان ايىرىلادى جانە ءبىلىم بەرۋ قىزمەتىن جۇزەگە اسىرا المايدى»، - دەدى ساياسات نۇربەك.
شەنەۋنىكتىڭ ايتۋىنشا، قازاقستاندا بيىلدىڭ وزىندە 10 387 ورىندىق 40-تان استام جاتاقحانا پايدالانۋعا بەرىلەدى. بۇل رەتتە نۇربەك ستۋدەنتتەردىڭ وزدەرى جاتاقحانادان باس تارتۋ فاكتىلەرىن ايتتى. ولاردىڭ تاڭداۋىنا مينيسترلىك ىقپال ەتە المايدى.
«20 مىڭعا جۋىق ستۋدەنت جاتاقحانادا تۇرادى. ءبىز كەلىسىمشارتقا وتىرعان جاتاقحانالاردى قاداعالاپ وتىرامىز. سونىمەن بىرگە ستۋدەنتتەردىڭ باسپانا تاڭداۋىن شەكتەۋگە قۇقىعىمىز جوق: پاتەر جالداۋ، جاتاقحانادا تۇرۋ. مۇنداي ەسەپتى جۇرگىزۋ وتە قيىن، ءىس جۇزىندە مۇمكىن ەمەس. سەبەبى ستۋدەنتتەردىڭ ءبىر بولىگى جاتاقحاناداعى ورىنداردان وزدەرى باس تارتادى»، - دەپ قوستى مينيستر.
«ادىرنا» ۇلتتىق پورتالى
