الماتىدا وڭىرلىك كاسىپكەرلەر پالاتاسىنىڭ توراعاسى نۇرسۇلتان شوقانوۆ يراك رەسپۋبليكاسى ەلشىلىگىنىڭ ۋاقىتشا سەنىمدى وكىلى دجابەر ناجم ابدۋللا ءال تەميميمەن كەزدەستى. تاراپتار ساۋدا-ەكونوميكالىق سالاداعى ىنتىماقتاستىق جانە ىسكەرلىك بايلانىس ورناتۋ ماسەلەلەرىن تالقىلادى.
ايتا كەتەيىك، يراكتىڭ قازاقستانداعى ەلشىلىگى 2008 جىلدىڭ 12 قازانىنان باستاپ جۇمىس ىستەيدى. ەلدەر اراسىنداعى تاۋار اينالىمى 2022 جىلى 7,4 ملن دوللاردى قۇرادى. دەلەگاتسيا وكىلدەرىنىڭ ايتۋىنشا، يراك بيلىگى يراك نارىعىنا قازاقستاندىق كومپانيالار مەن ينۆەستيتسيالاردى تارتۋعا قىزىعۋشىلىق تانىتۋدا.
قر ۇلتتىق ەكونوميكا مينيسترلىگى ستاتيستيكا كوميتەتىنىڭ دەرەكتەرىنە سايكەس 2019 جىلدىڭ سوڭىنا قاراي قازاقستان مەن يراك اراسىنداعى ساۋدا كولەمى 3 ملن دوللارعا جۋىق سومانى قۇرادى. 2018 جىلى بۇل كورسەتكىش 3,1 ملن دوللاردى قۇرادى جانە ەكسپورت كولەمىنە قاتىستى بولدى.
«يراك قازاقستانمەن كوپجاقتى ىنتىماقتاستىق ورناتۋعا ۇمتىلادى جانە ءبىزدىڭ حالىقارالىق باستامالارىمىزعا قولداۋ بىلدىرەدى. ءبىزدىڭ ساۋدا پالاتا ءسىزدىڭ كاسىپكەرلەر پالاتاسىمەن ىنتىماقتاستىق ورناتقىسى كەلەدى»، – دەپ اتاپ ءوتتى دجابەر ناجم ابدۋللاح ءال تەميمي.
سپيكەردىڭ ايتۋىنشا، يراكتىڭ ساۋدا-ونەركاسىپ پالاتاسى «اتامەكەن» ۇكپ سياقتى ەلىمىزدىڭ بارلىق وڭىرلەرىندە دە وكىلدىگى بار.
الماتى قالاسى كاسىپكەرلەر پالاتاسىنىڭ توراعاسى نۇرسۇلتان شوقانوۆ وڭىرلىك پالاتا ىنتىماقتاستىققا دايىن ەكەنىن ايتتى.
«كاسىپكەرلەر پالاتاسى ىنتىماقتاستىق قۇرۋعا اشىق. ءبىزدىڭ باستى مىندەتىمىز – بيزنەستى جان-جاقتى قولداۋ، ونىڭ مۇددەسىن قورعاۋ. ارينە، ينۆەستورلارمەن جۇمىس ىستەۋ باسىم باعىتتاردىڭ ءبىرى. ءبىز ەكى ەلدىڭ ەكونوميكاسىن دامىتۋعا ىقپال ەتەتىن بىرلەسكەن جوبالاردى ىسكە اسىرۋدى تالقىلاۋعا دايىنبىز»، – دەپ اتاپ ءوتتى نۇرسۇلتان شوقانوۆ.
سپيكەر الماتى قالاسىنىڭ ەكونوميكالىق مۇمكىندىكتەرى تۋرالى دا ايتتى. وڭتۇستىك استانادا ساۋدا، قىزمەت كورسەتۋ، ونەركاسىپپەن قاتار تۋريزم سالاسى قارقىندى دامىپ كەلەدى.
«جاقىندا قالا اكىمدىگى مەگاپوليستى دامىتۋدىڭ 2040 جىلعا دەيىنگى باس جوسپارىن بەكىتتى. مامانداردىڭ بولجامىنا سايكەس، قالا حالقى وسى ۋاقىتقا دەيىن 3 ميلليون ادامعا دەيىن وسەدى. بۇل ينفراقۇرىلىم، تۇرعىن ءۇي، كوممەرتسيالىق جانە الەۋمەتتىك نىسانداردىڭ قۇرىلىسىنا ۇلكەن ينۆەستيتسيا سالىناتىنىن بىلدىرەدى. ارينە، الەۋمەتتىك-ەكونوميكالىق دامۋ سەرپىنى بيزنەس ءۇشىن جاڭا مۇمكىندىكتەر اشادى»، – دەپ اتاپ ءوتتى وڭىرلىك كاسىپكەرلەر پالاتاسىنىڭ باسشىسى.
نۇرسۇلتان شوقانوۆ الماتىدا بىرلەسكەن جوبالاردى ىسكە قوسۋعا بولاتىن بىرقاتار ەركىن ەكونوميكالىق ايماق جۇمىس ىستەيتىنىن، قىتاي مەن ەۋروپانىڭ ساۋدا جولدارىنا جاقسى قولجەتىمدىلىك دامىعانىن ايتتى.
كەزدەسۋ قورىتىندىسى بويىنشا تاراپتار يراكتىڭ ساۋدا پالاتاسى مەن «اتامەكەن» ۇلتتىق كاسىپكەرلەر پالاتاسى اراسىنداعى ىنتىماقتاستىقتى ەگجەي-تەگجەي تالقىلاۋعا كەلىستى.
كەزدەسۋگە الماتى قالاسى كاسىپكەرلەر پالاتاسىنىڭ باسشىلىعى، يراك رەسپۋبليكاسى ەلشىلىگىنىڭ كونسۋلى ءالي ءسالىم جاسيم ءال-رۋباي، الماتى قالاسى وكپ حالىقارالىق ىنتىماقتاستىقتى دامىتۋ بويىنشا جەتەكشى ساراپشى اينۇر باسپاقوۆا قاتىستى.
